नाशिक : दहा हजाराची लाच स्वीकारल्याचे प्रकरण घडल्यानंतर कळवण प्रकल्प अधिकारी विकास मीना ॲक्शन मोडवर आले असून कर्तव्यात कसूर आणि हलगर्जीपणा केल्याप्रकरणी कार्यालयातील दोघा कनिष्ठ लिपिक यांचे निलंबन केले आहे. यासह लाचखोर प्रताप वडजे यांच्यावर देखील निलंबन करण्यात आली आहे. (2 junior clerks suspended in Kalwan project Nashik Latest Marathi Bribe Crime news)

स्वयंपाकी म्हणून नियुक्तीपत्र देण्यासाठी दहा हजाराची लाच स्वीकारताना कळवण प्रकल्प कार्यालयाचे सहाय्यक प्रकल्प अधिकारी प्रताप वडजे यांना लाचलुचपत प्रतिबंधक विभागाच्या पथकाने रंगेहाथ पकडले होते.

या कारवाईनंतर आदिवासी आयुक्त कार्यालयाकडून देखील या बाबत प्रकल्प अधिकारी यांना विचारणा करण्यात आली होती. यानंतर प्रकल्प अधिकारी विकास मीना यांनी या प्रकरणात दोषी असलेल्या कनिष्ठ लिपिक हेमंत भोये व जगन उबाळे यांना निलंबित केले आहे.

सदर प्रकरणात सदरचे नियुक्तीपत्र हे जावकचे कनिष्ठ लिपिक यांच्याकडे त्यांनी ते संबंधित यांना देणे अपेक्षित असताना देखील तक्रारदार यांच्या पत्नीचे नियुक्तिपत्र हे प्रताप वडजे यांच्याकडे गेल्याने यातील दोघा लिपिकांना निलंबित करण्यात आलेले आहे.

वडजेनी राखून ठेवले नियुक्तीपत्र

तक्रारदार यांच्या पत्नी यांना स्वयंपाकी म्हणून नियुक्ती देण्याच्या आदेशावर प्रकल्प अधिकारी यांनी दहा ते बारा दिवस अगोदरच स्वाक्षरी केली असताना देखील कार्यालयातून नियुक्तीपत्र हे संबंधित यांना देण्याऐवजी ते वडजे यांनी लाचेच्या लोभापोटी आपल्याकडेच ठेवले होते. त्यानंतर २९ ऑगस्ट रोजी या प्रकरणात वडजेंना लाच घेताना अटक झाली.