वडनेर भैरव (जि. नाशिक) : येथून जवळच असलेल्या शिरवाडे फाट्याजवळ वडनेर भैरव पोलिस ठाण्याच्या हद्दीत मटका व्यवसाय (Matka) सुरू करण्यासाठी सहाय्यक पोलिस निरीक्षकांच्या सांगण्यावरून लाच (Bribe) घेताना दोन हवालदारांना लाचलुचपत प्रतिबंधक विभागाच्या (Bribery Prevention Department) पथकाने पकडले. लाचलुचपत विभागाच्या पोलिस निरीक्षक गायत्री जाधव यांच्या पथकाने ही कारवाई केली. रात्री उशिरापर्यंत गुन्हा दाखल करण्याचे काम सुरू होते. (2 police arrested for taking bribe for matka Nashik Crime News)

याबाबत सविस्तर वृत्त असे, की वडनेर भैरव पोलिस ठाण्याच्या हद्दीत शिरवाडे फाट्याजवळ तक्रारदाराला मटका सुरू करायचा होता. त्यासाठी वडनेर भैरवच्या वरिष्ठ अधिकाऱ्यास ८० हजार रुपये देण्याचे ठरले होते. त्यापैकी ४० हजार रुपये गुरुवारी (ता. ९) देण्यासाठी फिर्यादीसह लाचलुचपत विभागाचे पथक कारवाईसाठी गेले असता, वरिष्ठ अधिकाऱ्याने ‘उद्या सकाळी या’, असे सांगून विषय लांबविला. त्यानुसार फिर्यादीने शुक्रवारी (ता. १०) मुंबई- आग्रा महामार्गावरील हॉटेल सिटीजन या ठिकाणी मध्यस्थी पोलिस शिपाई किसन रमेश कापसे (वय ३२) याच्या माध्यमातून दुसरा पोलिस कर्मचारी संतोष दिनकर वाघ (वय ३९) यांच्याकडे ठरलेली रक्कम दिली.

त्याचवेळी दबा धरून बसलेल्या लाचलुचपत विभागाच्या पोलिस निरीक्षक गायत्री जाधव यांच्या पथकाने लाच स्वीकारणाऱ्या कर्मचाऱ्यांना बेड्या ठोकल्या. रात्री उशिरापर्यंत गुन्हा दाखल करण्याचे काम वडनेर भैरव पोलिस ठाण्यात सुरू होते. पथकामध्ये पोलिस हवालदार प्रफुल्ल माळी, पोलिस नाईक प्रकाश महाजन यांचा समावेश होता.

सहाय्यक निरीक्षक संशयाच्या भोवऱ्यात

एकीकडे पोलिस अधीक्षक जिल्ह्यातील अवैध धंद्यांचे समूळ उच्चाटन करण्यासाठी प्रयत्नशील असताना दुसरीकडे द्राक्षपंढरी संबोधल्या जाणाऱ्या आणि माजी आमदाराच्या गावातील पोलिस ठाण्यातील अधिकारीच अवैध धंद्यांना पाठीशी घालण्यासाठी लाच प्रकरणात अडकत असतील, तर यासारखी लाजीरवाणी बाब नाही, अशा प्रतिक्रिया ग्रामस्थांमधून उमटत आहे.