जुने नाशिक : मध्यवर्ती गुन्हे शाखेच्या पथकाने हत्यारांसह दोन संशयितांना अटक करण्यात आली. त्यांच्याकडून दोन धारदार हत्यारांसह रिक्षा जप्त करण्यात आली. (2 suspects arrested for carrying weapons Latest nashik Crime Update Marathi News)

मध्यवर्ती गुन्हे शाखेचे पोलिस उपनिरीक्षक सुनील माळी यांना दोन संशयित गंगापूर रोड येथील मॅरेथॉन चौकात हत्यार बाळगून रिक्षात बसले असल्याची माहिती मिळाली. त्यांनी वरिष्ठांना याबाबत माहिती दिली.

वरिष्ठ निरीक्षक आँचल मुदगल यांच्या मार्गदर्शनाखाली श्री. माळी, पोलिस कर्मचारी शेरखान पठाण, श्री. सपकाळ, बाळू बागूल, संजय गामणे, संदीप पवार घटनास्थळी दाखल झाले. रिक्षा (एमएच- १५- ईएच- २६३८) उभी असल्याचे आढळून आले.

त्यांनी संशयित हर्षद सुभाष बरु (२८, रा. शिवाजीनगर, सातपूर), अभिषेक मारुती कांबळे (१९, रा. रामनगर जेहान सर्कल) अशा दोघांना ताब्यात घेतले. त्यांची अंगझडती घेतली असता त्यांच्याकडे धारदार चॉपर आणि कोयता मिळून आला. दोघांविरुद्ध सरकारवाडा पोलिस ठाण्यात गुन्हा दाखल करण्यात आला. पुढील कारवाई सरकारवाडा पोलिसांकडून करण्यात येत आहे.