नाशिक : तडीपार केले असतानाही शहरात वावरणाऱ्या दोघा गुंडांना गुन्हे शाखा युनिट दोनने अटक केली आहे. याबाबत तडीपार आदेशाचे उल्लंघन केल्याचे गुन्हे दाखल करण्यात आले आहेत. दीपक ऊर्फ डेमो भाऊसाहेब जाधव (२२, रा. हनुमंतनगर, लोखंडे मळा, जेलरोड) व अजय प्रवीण दहेकर(२१, रा. शांती विलास अपार्टमेंट, आनंदनगर, पाथर्डी शिवार) अशी दोघा संशयितांची नावे आहेत. (2 Tadipar gangsters arrested Nashik Crime News)

हेही वाचा : द मिसिंग टाइल सिंड्रोम ठेवा आपल्यापासून दूर

पोलिस आयुक्त अंकुश शिंदे, गुन्हे शाखेचे उपायुक्त प्रशांत बच्छाव, सहाय्यक आयुक्त वसंत मोरे यांनी नाशिक शहर व जिल्ह्यातून हद्दपार केलेल्या व विनापरवानगी शहरात आलेल्या तडीपारांवर कारवाईचे आदेश पोलिसांना दिले होते.

त्याअनुषंगाने मोहीम सुरू असताना शनिवारी (ता. ७) युनिट दोनचे हवालदार सुगन साबरे यांना दीपक ऊर्फ डेमो याची माहिती मिळाली. त्यांनी कारवाई करून ताब्यात घेतले. त्याचा ताबा उपनगर पोलिसांकडे दिला आहे. यासह हवालदार चंद्रकांत गवळी यांना रेकॉर्डवरील गुन्हेगार अजय हा हॉटेल गारवा फॅमिली गार्डनजवळ आल्याची माहिती समजली.

त्यांनी पथकासह त्याला पकडून इंदिरानगर पोलिसांच्या ताब्यात दिले. युनिट दोनचे पोलिस निरीक्षक आनंदा वाघ, उपनिरीक्षक पोपट कारवाळ, हवालदार प्रकाश भालेराव, सुगन साबरे, राजेंद्र घुमरे, शंकर काळे, प्रकाश बोडके, चंद्रकांत गवळी, नंदकुमार नांदुर्डीकर, प्रशांत वालझाडे यांनी ही कारवाई केली.