नाशिक : मृग नक्षत्रामध्ये जिल्ह्यात पावसाने दडी मारल्यानंतर आर्द्रा नक्षत्राच्या पहिल्याच दिवशी बुधवारी जिल्ह्यात सर्वदूर पावसाने दमदार हजेरी लावली. यावेळी शिवडे (ता.सिन्नर) येथे अंगावर वीज पडल्याने २१ वर्षीय तरुणाचा मृत्यू झाला. जिल्ह्यात पावसाने दमदार हजेरी लावल्याने बळिराजा सुखावला असून जिल्ह्यात पेरणीला वेग येणार आहे. पुढील काही दिवस राज्यात चांगला पाऊस पडणार असल्याचे देखील हवामान खात्याकडून सांगण्यात आले आहे.

जिल्ह्यात मागील काही दिवसांपासून सर्वांकडून दमदार पावसाची वाट पाहिली जात होती. मृग नक्षत्रामध्ये दमदार पाऊस असे सर्वांना वाटत होते. मात्र जिल्ह्यातील काही भाग वगळता संपूर्ण जिल्हा पावसाची वाट पाहत होता. बुधवारी (ता.२२) मृग नक्षत्रातून आर्द्रा नक्षत्रास सुरवात झाल्यानंतर जिल्ह्यातील येवला, बागलाण, कळवण, नांदगाव, मालेगाव, सिन्नर, निफाड, चांदवड या तालुक्यांमध्ये दुपारनंतर पावसाने एक ते दीड तास कोसळत जोरदार हजेरी लावली.

जिल्ह्यातील अनेक तालुक्यांमध्ये पावसाने सर्वदूर हजेरी लावल्याने बळिराजा चांगलाच सुखावला आहे. या पावसामुळे जिल्ह्यातील पीक पेरणीला वेग येणार आहे. जिल्हा प्रशासनाकडून प्रसिद्ध करण्यात आलेल्या पावसाच्या अहवालामध्ये बुधवार दुपारी साडेबारा वाजेपर्यंत जिल्ह्यात १.७ मिमि पाऊस पडला आहे. जिल्ह्याप्रमाणेच नाशिक शहरात देखील दुपारी सव्वादोन नंतर पावसाने जोरदार हजेरी लावली. शहरात सायंकाळपर्यंत ३० मिमि पावसाची नोंद झाली होती.

झाडाचा आडोसा ठरला शेवट

शिवडे (ता. नाशिक) येथे बुधवारी दुपारी पावणेचारच्या सुमारास तरुणाच्या अंगावर वीज पडून त्याचा जागीच मृत्यू झाला. रवींद्र पवार (वय २१ रा. एकलव्य वस्ती) असे मृत तरुणाचे नाव आहे. रवींद्र दुपारी शेळ्यांना जनता विद्यालयाच्या पाठीमागे चारण्यासाठी घेऊन गेला. साडेतीन वाजेच्या दरम्यान शिवडे परिसरात विजांच्या कडकडाटासह जोरदार पावसाला सुरवात झाली. याचवेळी रवींद्र याने एका झाडाखाली आडोसा घेतला असता झाडावर वीज पडली. रविंद्रला त्याचा जोरदार झटका बसून त्याचा जागीच मृत्यू झाला.