Nashik CA Foundation Result : दी इन्‍स्‍टिट्यूट ऑफ चार्टर्ड अकाउंटंट्‌स ऑफ इंडिया (आयसीएआय) यांच्‍यातर्फे डिसेंबर २०२३ मध्ये झालेल्‍या चार्टर्ड अकाउंटंट्‌स फाउंडेशन परीक्षेचा निकाल गुरुवारी (ता.८) जाहीर झाला.

या परीक्षेत नाशिकमधून प्रविष्ट एक हजार ०९३ विद्यार्थ्यांपैकी २७३ विद्यार्थी उत्तीर्ण झाले आहेत. (273 students passed in CA foundation exam with brilliant performance nashik news)

नाशिकमधून आकाश लांडे, तनिष्का पवार, मंथन कुमावत यांच्‍यासह इतर विद्यार्थ्यांनी चमकदार कामगिरी केली आहे. सनदी लेखापाल (सीए) शिक्षणक्रमासाठी प्रवेश परीक्षा असलेल्‍या सीए फाउंडेशन परीक्षेचे आयसीएआय यांच्‍यातर्फे वर्षातून दोन वेळा आयोजन केले जाते. डिसेंबर २०२३ मध्ये झालेल्‍या परीक्षेचा निकाल नुकताच जाहीर केला.

या परीक्षेला देशभरातून प्रविष्ट झालेल्‍या एक लाख ३७ हजार १५३ पैकी ४१ हजार १३२ विद्यार्थी उत्तीर्ण झाले आहेत. नाशिकमधून आकाश लांडे याने ३२० गुण मिळवताना चमकदार कामगिरी केली. तसेच तनिष्का पवार हिने ३१८ आणि मंथन कुमावत याने ३१२ गुण मिळवताना घवघवीत यश मिळविले आहे. उत्तीर्ण विद्यार्थी सनदी लेखापाल शिक्षणक्रमाच्‍या पुढील टप्प्‍यात प्रवेशासाठी पात्र झाले आहेत.

राष्ट्रीय स्‍तरापेक्षा उत्तीर्णांचे प्रमाण कमी

देशपातळीवर सीए फाउंडेशन परीक्षेत उत्तीर्ण विद्यार्थ्यांची टक्‍केवारी २९.९९ इतकी आहे. तर नाशिकमधून उत्तीर्ण विद्यार्थ्यांची टक्‍केवारी २४.९७ टक्‍के इतकी आहे. राष्ट्रीय पातळीवरील उत्तीर्णांच्‍या तुलनेत नाशिकची टक्‍केवारी पाचने कमी आहे.