येवला (जि. नाशिक) : धुळगाव येथे लांडग्यांच्या हल्ल्यात ५ शेळ्या मृत्यूमुखी पडल्या असून ९ शेळ्या गंभीर जखमी झाल्या आहेत. या घटनेमुळे शेतकऱ्याला मोठा आर्थिक फटका बसला आहे. इतर शेतकरीही धास्तावले आहेत. (5 goats killed in wolf attack 9 seriously injured Nashik News)

तालुक्यात पश्चिम भागात तसेच इतरत्रही अधूनमधून बिबट्या आल्याची चर्चा होते. त्यातच पूर्व भागातील राजापूर, ममदापूर भागातही शेळ्या खाल्याच्या घटना आहेत. मात्र शहराजवळ असलेल्या व डोंगराळी पट्ट्यापासून लांबवर असलेल्या धुळगाव येथे लांडगा आल्याची घटना घडल्याने शेतकरी व पशुपालक धास्तावले आहेत.

धुळगाव येथील शेतकरी दिगंबर जगताप हे शेळ्या नेहमीप्रमाणे बाहेर बांधून घरात झोपले होते. रात्री दोनच्या सुमारास शेळ्यांसाठी बांधलेल्या कुंपणा खालची माती उकरून लांडग्याने शेळ्यावर हल्ला केला. या हल्लात नऊ शेळ्या जखमी झाल्या असून पाच मृत्युमुखी पडल्या आहेत.

हेही वाचा : द मिसिंग टाइल सिंड्रोम ठेवा आपल्यापासून दूर

घटनेची माहिती मिळताच वनविभागासह पशुवैद्यकीय अधिकारी घटनास्थळी दाखल झाले. वनविभागाच्या अधिकाऱ्यानी घटनास्थळाचा पंचनामा केला असून पशुवैद्यकीय अधिकाऱ्यांनी जागेवरच विच्छेदन केले. घटनेची माहिती मिळताच माजी सभापती प्रवीण गायकवाड यांनी घटनास्थळी भेट देत मदत मिळवून देण्यासाठी प्रयत्न करण्याचे आश्वासन दिले.

माजी सरपंच बाळासाहेब गायकवाड, सोमनाथ गायकवाड, योगेश सोमवंशी, भगवान गायकवाड, तुषार गायकवाड, हरिभाऊ गायकवाड, बाजीराव डोईफोडे यांच्यासह शेतकरी उपस्थित होते. वनविभाग व पशुवैद्यकीय विभागाने मृत शेळ्यांचा पंचनामा केला. नुकसानग्रस्त शेतकऱ्याला शासनाच्या माध्यमातून मदत मिळावी अशी मागणी माजी सभापती प्रवीण गायकवाड यांच्यासह धुळगाव येथील शेतकऱ्यांनी केली आहे.