मालेगाव (जि. नाशिक) : शहरातील नयापुरा व नूरबाग परिसरात मध्यरात्री जिल्हा पोलिस प्रमुख सचिन पाटील यांच्या मार्गदर्शनाखाली शहर पोलिस पथकाने तीन देशी बनावटीचे पिस्तूल, सात जिवंत काडतुसे जप्त केले. या प्रकरणी पाच संशयितांना अटक करण्यात आली आहे. जिल्ह्यातील कायदा व सुव्यवस्था अबाधित राहावी, अवैध धंद्यांचे समूळ उच्चाटन व्हावे या हेतूने जिल्ह्यात विविध कारवाया सुरू आहेत. या मोहिमेत पोलिसांनी शहरात मोठी कारवाई केली.

अपर पोलिस अधीक्षक चंद्रकांत खांडवी, उपअधीक्षक लता दोंदे यांच्या मार्गदर्शनाखाली सहाय्यक पोलिस निरीक्षक काळे, हवालदार दिनेश पवार, पोलिस नाईक राकेश उबाळे, पोलिस शिपाई तुषार आहिरे यांनी दोन वेगवेगळ्या ठिकाणी ही कारवाई केली. पोलिसांनी कारवाईत पिस्तूल व काडतुसासह ६० हजार रुपयांचा ऐवज जप्त केला. या कारवाईत अवैधरीत्या पिस्तूल बाळगणाऱ्या हफिजूर रेहमान मोहम्मद इद्रीस (रा. नयापुरा), इम्रानखान अताउल्लाखान उर्फ शेट्टी (रा. दातारनगर), शेहजाद अख्तर मोहम्मद सिद्दीक (रा. हजारखोली), अब्दुल रेहमान शेख हसन (रा. कमालपुरा), अझरुद्दीन गयासुद्दीन सैय्यद (रा. आयशानगर) यांना अटक करण्यात आली. आझादनगर व आयशानगर पोलिस ठाण्यात विनापरवाना प्राणघातक शस्त्र बाळगण्याच्या आरोपावरून गुन्हा दाखल करण्यात आला आहे.