Nashik Cyber Crime : शेअर मार्केटमधील गुंतवणुकीवर भरघोस मोबदल्याचे आमिष दाखवून भामट्यांनी शहरातील एकाला सहा लाखाला गंडविल्याचा प्रकार समोर आला आहे.

वेगवेगळ्या बँक खात्यात रक्कम भरण्यास भाग पाडून फसवणूक करण्यात आली. याप्रकरणी सायबर पोलिस ठाण्यात फसवणूक व माहिती तंत्रज्ञान कायद्यानुसार गुन्हा दाखल करण्यात आला आहे. (6 lakh fraud with lure of investment Nashik Crime)

हेही वाचा : Credit Card फसवणूक....काय घ्याल काळजी?

राहुल बापू पाटील (रा. पोकार कॉलनी, दिंडोरी रोड) यांनी तक्रार दाखल केली आहे. २३ जुलैला ९६६९४९६२२८ या मोबाईल क्रमांकावरून पाटील यांच्याशी संपर्क साधला होता.

अल्गो ट्रेडिंगमध्ये गुंतवणुक केल्यास मोठा नफा मिळवून देण्याचे संबंधितांनी आमिष दाखविल्याने पाटील भूलथापांना बळी पडले. ७४१५०१०२५१ व्हॉटसॲपवरून भामट्याने त्यांच्याशी वेळोवेळी संपर्क साधत एचडीएफसी आणि युनियन बँक खात्यावर त्यांना पैसे टाकण्यास भाग पाडले.

३ ऑगस्टला पाटील यांनी भामट्याने सांगितलेल्या बँक खात्यांवर ५ लाख ७३ हजार ३५० रुपयांची रक्कम भरली. मात्र त्यानंतर संशयिताने ट्रेडिंग माध्यमातून शेअर मार्केटमध्ये गुंतवणुक न करताच परस्पर अपहार केल्याचा प्रकार समोर आल्याने पाटील यांनी पोलिसात धाव घेतली. अधिक तपास सायबर पोलिस ठाण्याचे वरिष्ठ निरीक्षक रियाज शेख करीत आहेत.