इगतपुरी (जि. नाशिक) : मुंबई- नागपूर समृद्धी महामार्गावर नांदगाव सदो ते शहापूर तालुक्यातील वाशाळापर्यंतच्या आठ किलोमीटर लांब १७.५ मीटर रुंद असे दुहेरी बोगद्याचे काम पूर्ण झाले आहे. भारतातील सर्वांत रुंद आणि चौथ्या क्रमांकाचा दुहेरी बोगदा आहे. या महामार्गावर मुंबईला जाण्यासाठी व मुंबईहून येण्यासाठी स्वतंत्र आठ किलोमीटरचे दोन बोगदे तयार झाले आहेत. समृद्धी महामार्गावरील कसारा घाट भेदून इगतपुरीजवळ हे बोगदे तयार करण्यात आले.

दोन्ही बोगद्याची लांबी आठ किलोमीटर असून रुंदी १७.५ मीटर आहे. एफकॉन इंफ्रास्ट्रक्चर कंपनीचे प्रोजेक्ट व्यवस्थापक शेखर दास यांच्या मार्गदर्शनाखाली अभियंता शक्ती उपाध्याय, राजीव सिंह, एम. एन. राव, परितकर, पारीख व त्यांच्या दीड हजार कामगार व दीडशे अभियंते अशा बाहुबली टीमने हे शिवधनुष्य पेलले. या बोगद्याने आणखी एक विक्रम नोंदवला तो म्हणजे आठ किलोमीटरचा हा दुहेरी बोगदा केवळ दोन वर्षात पूर्ण झाला आहे.

अभियांत्रिकीचा चमत्कार

अभियांत्रिकीच्या इतिहासात भारतात तरी अशी नोंद नाही अशी माहिती महाराष्ट्र राज्य रस्ते विकास महामंडळाचे सहव्यवस्थापकीय संचालक आणि सार्वजनिक बांधकाम विभागाचे सचिव अनिलकुमार गायकवाड यांनी दिली. ५५ हजार कोटी रूपयांचा मुंबई नागपूर समृद्धी महामार्ग सातशे किलोमीटरचा असून इगतपुरीतील दुहेरी बोगदा हा या महामार्गाचा महत्त्वाचा टप्पा आहे. २७४५ कोटी रुपये खर्च करून हा बोगदा खोदण्यासाठी ऑस्ट्रेलियन तंत्राचा वापर करण्यात आला होता.

कसारा घाट पाच मिनिटात पार

कसारा घाट पार करण्यासाठी वाहतूक कोंडी नसेल तर आजच्या घडीला ३० ते ३५ मिनिटे लागतात. मात्र या बोगद्यातून कसारा घाट पार करण्यासाठी केवळ पाच मिनिटे लागणार आहेत. दोन वर्षात दुहेरी बोगद्याचे काम पूर्ण झाल्याने एफकॉन इंफ्रास्ट्रक्चर कंपनीच्या अभियंत्यांनी आनंद व्यक्त केला.