Nashik News : धानोरे येथील रहिवासी असलेला भारतीय सैन्य दलातील जवान श्रीराम राजेंद्र गुजर (२४) हे सुटीवर गावी आले असताना शिर्डी येथून साईबाबाचे देवदर्शन करून सोनेवाडी (ता. कोपरगाव, जि. अहमदनगर) येथे नातेवाईकांकडून घरी येत असताना दुचाकी पल्सर गाडीचा अपघात झाला. (Accidental death of soldier nashik accident news)

ही घटना १६ जुलैला दुपारी अडीचच्या सुमारास सिन्नर-शिर्डी राष्ट्रीय महामार्गावर पाथरे (ता.सिन्नर) येथे घडली. श्रीराम यांच्या निधनामुळे गावावर शोककळा पसरली असून मंगळवारी (ता.१८) सकाळी अकराला धानोरे येथे अंत्यसंस्कार होणार आहेत.

आसाम (गुवाहाटी) येथे भारतीय सैन्य दलात शिपाई जहाज ऑपरेटर म्हणून कर्तव्यावर होते. पंचवीस दिवसांपूर्वी सुटीवर आलेले श्रीराम राजेंद्र गुजर शिर्डी येथून देवदर्शन करून नातेवाईकांकडून घरी जाण्यासाठी निघाले होते. त्यांच्या पल्सर (एमएच १५. एचए ९००६) दुचाकीला समोरून येणाऱ्या प्लॅटिना दुचाकीने जोरदार धडक दिली.

या अपघातात प्लॅटिनावरील व श्रीराम गंभीर जखमी झाले. श्रीराम यांच्या सोबत असलेला मावसभाऊ अक्षय ऊर्फ बबलू पांडुरंग जावळे (२५. रा. सोनगाव, ता. कोपरगाव) यांना गंभीर मार लागल्याने त्यांचा जागीच मृत्यू झाला.

हेही वाचा : Credit Card फसवणूक....काय घ्याल काळजी?

अपघातानंतर पाथरेचे ग्रामस्थ व पिंपरवाडी टोल नाका मदत पथकाने श्रीराम व अपघातग्रस्तांना शिर्डी येथे साई संस्थांच्या सुपर स्पेशलिटी हॉस्पिटलमध्ये दाखल केले. उपचारादम्यान श्रीराम यांची प्राणज्योत मालवली. त्यांच्यामागे आजोबा संतू, आई अनिता, शेतकरी वडील राजेंद्र, भाऊ नितिन, बहीण प्रियंका असा परिवार आहे.

आज ड्युटीवर निघणार होते...

महिन्याच्या सुट्टीवर गावी आलेल्या श्रीराम नातेवाईकांना भेटून मंगळवारी (ता.१८) कर्तव्यावर हजर होण्यासाठी जाणार होते, परंतु दुर्दैवाने त्यांच्या आतच काळाने घाला घातला. शेतकरी कुटुंबात जन्मलेल्या श्रीराम यांनी अतिशय हलाखीच्या परिस्थितीत आपले शिक्षण पूर्ण केले.

दहावीपर्यंतचे शिक्षण रूई येथील न्यू इंग्लिश स्कूलमध्ये घेतले. नंतर बारावीचे शिक्षण विंचूर येथील कर्मवीर भाऊराव पाटील उच्च माध्यमिक विद्यालयात पूर्ण करून सैन्यदलात भरती झाले. पुणे येथे सेवेला प्रारंभ झाला. श्रीराम हे भारतीय सैन्य दलात बॉम्बे इंजिनिअर कोर २३६ IWT युनिटमध्ये कार्यरत होते.