नाशिक : पंचवटी परिसरातील मीनाताई ठाकरे विभागीय क्रीडासंकुल परिसराजवळ कुंभमेळा-२०१५ च्या कालावधीत दरोड्याच्‍या तयारीत असलेल्‍या टोळीतील नऊ जणांपैकी तिघांना पंचवटी पोलिसांनी अटक केली होती. या तिघांना जिल्‍हा व सत्र न्यायाधीश एस. टी. पांडे यांनी दोन महिने ते ६३ दिवसांची साध्या कैदेची शिक्षा सुनावली. 

अनेक शस्त्र आढळले
शिक्षा ठोठावलेल्‍या आरोपींची नावे श्रीराम आझाद, शिवप्रसाद आझाद आणि सुरेशकुमार नायडू (सर्व रा. उत्तर प्रदेश) अशी आहेत. २६ ऑगस्ट २०१५ला मध्यरात्री पंचवटी पोलिसांनी क्रीडासंकुलाच्‍या आवारात टोळीला संशयास्पदरीत्या फिरताना अटक केली होती. सखोल चौकशी करताना, त्‍यांच्‍याकडे गज, लाकडी दांडा, कोयता आदी शस्त्र आढळले होते.

हेही वाचा - शुभमंगल सावधान आणि 'त्यांच्या' पासूनही जरा सावधान! टार्गेट सप्तपदीचा मुहूर्त

फरारी सहा संशयितांवर खटला सुरू 

तत्कालीन पोलिस उपनिरीक्षक डी. जे. मुळे यांनी तपास करून न्यायालयात दोषारोपपत्र दाखल केले होते. सरकारी पक्षातर्फे सहाय्यक सरकारी वकील योगेश कापसे यांनी युक्तिवाद केला. या खटल्‍यात तीन संशयितांविरोधात खटला सुरू असताना परिस्थितीजन्य पुराव्यांच्या आधारे मुंबई पोलिस कायदा कलम १२२ नुसार श्रीराम आझाद यास ६३ दिवस, शिवप्रसाद आझाद यास ५८ आणि सुरेशकुमार नायडू यास दोन महिन्यांची साधी कैद सुनावली. पैरवी अधिकारी म्हणून पोलिस नाईक एस. एल. जगताप यांनी काम पाहिले. या प्रकरणातील फरारी सहा संशयितांवर खटला सुरू राहील. 

हेही वाचा - निनावी पत्रावरून पोलीसांनी लावला शोध, हाती लागली धक्कादायक माहिती