नाशिक : ठक्कर बाजार बसस्थानकात जाणाऱ्या महिलेचा विनयभंग करणाऱ्यास न्यायालयाने एका वर्षाचा सश्रम कारावास व १० हजार रुपयांचा दंडाची शिक्षा ठोठावली. ईशाद राजमोहमंद मणियार (३२, रा. चांदवड) असे आरोपीचे नाव आहे. (Accused sentenced to hard labor in molestation case Nashik Latest Crime News)

महिलेने दिलेल्या फिर्यादीनुसार त्या ३ ऑगस्ट २०१९ रोजी सकाळी साडेसातच्या सुमारास ठक्कर बाजार बसस्थानकात बसमध्ये जात होत्या. त्या वेळी गर्दीचा फायदा घेत आरोपी ईशाद याने त्यांचा विनयभंग केला. याप्रकरणी सरकारवाडा पोलिस ठाण्यात विनयभंगाचा गुन्हा दाखल करण्यात आला. तत्कालीन पोलिस उपनिरीक्षक अशोक पाथरे यांनी तपास करून न्यायालयात दोषारोपपत्र दाखल केले.

सरकारी पक्षातर्फे ॲड. सलीम तडवी यांनी युक्तिवाद केला. गुन्हा शाबीत झाल्याने मुख्य न्यायदंडाधिकारी समीर जी. बावकर यांनी आरोपी ईशादला एका वर्षाचा सश्रम कारावास, व १० हजार रुपयांच्या दंडाची शिक्षा सुनावली आहे. पैरवी अधिकारी म्हणून पोलिस अंमलदार जी. ए. गायकवाड यांनी कामकाज पाहिले.