नाशिक : (सिन्नर) खेळ कुणाला दैवाचा कळला...अवघा वर्षभराचा संसार अन् पदरी दोन महिन्याचं गोंडस बाळ...पण काळाच्या पुढे कोण जाणार अन् घडले असे की क्षणार्धात होत्याचं नव्हतं झालं. ही ह्रदय पिळवटून टाकणारी घटना घडली सिन्नर तालुक्यातील भोकणी येथे...
अशी आहे घटना
जुन्या भोकणी ते पांगरी रस्त्यावर आंधळे चौफुलीजवळ कार पलटी होऊन डोक्याला गंभीर मार लागल्याने लष्करी जवान रितेश रामनाथ सानप (वय 26) जागीच गतप्राण झाला. भोकणी गावातील रितेश सानप हा मेरठ येथे लष्करात कार्यरत होता. दहा दिवसांपूर्वीच महिनाभराची सुट्टी घेऊन गावी आला होता. शनिवारी संध्याकाळी आठ वाजेच्या सुमारास तो कारमधून एकटाच घरी परतत होता. गाडीवरील नियंत्रण सुटल्याने आंधळे वस्तीवरील चौफुलीजवळ कार रस्त्याकडेच्या नालीत पलटी झाली. या अपघातात त्याच्या डोक्याला गंभीर मार लागल्याने जागीच मृत्यू झाला. ग्रामस्थांसह नातलगांना अपघाताची माहिती मिळताच त्यांनी घटनास्थळी धाव घेतली. रविवारी सकाळी दोडी ग्रामीण रुग्णालयात शवविच्छेदन केल्यानंतर मृतदेह नातेवाईकांच्या ताब्यात देण्यात आला.
श्लोकचे पितृछत्र अवघ्या दोन महिन्यात हरपले...
वर्षभरापूर्वी रितेशचा 8 मे 2019 ला शिंपी टाकळी येथील मोनिकाशी विवाह झाला होता. त्यांच्या संसारवेलीवर नुकतेच श्लोक नावाचे फुलही उमले होते. रितेशने सुटीवर येताच बाळंतपणासाठी गेलेली पत्नी आणि सव्वा दोन महिन्यांचा मुलास आठ दिवसांपूर्वीच भोकणी येथे आणले होते. त्याच्या अपघाती मृत्यूने मोनिकाचा संसार अवघ्या वर्षभरात मोडून पडला. तर बाळाचे अवघ्या सव्वा दोन महिन्यात पितृछत्र हरपले आहे. अंत्यसंस्काराच्या वेळी पत्नी आणि नातलगांचा आक्रोश हृदय पिळवटून टाकत होता.
शोकाकुल वातावरणात अंत्यसंस्कार
दुपारी 12.30 वाजता तहसीलदार राहुल कोताडे, वावीचे सहाय्यक पोलीस निरीक्षक रणजीत गलांडे, बाजार समितीचे माजी सभापती अरुण वाघ, देवळाली कॅम्पचे लष्कराचे अधिकारी यांनी पुष्पचक्र अर्पण केल्यानंतर शासकीय इतमामात शोकाकुल वातावरणात सोशल डिस्टन्स ठेवत अंत्यसंस्कार करण्यात आले. त्याच्या पश्चात आई-वडील, मुंबई पोलिस दलात कार्यरत असलेला भाऊ, पत्नी मोनिका आणि सव्वादोन महिन्याचा मुलगा श्लोक असा परिवार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.