नाशिक : ओझरमधील गोखले एज्युकेशन सोसायटीच्या एचएएल शाळेतील निवृत्त कलाशिक्षक दत्ताजी राठोड यांनी गणरायाचे स्वागत अगदी हटक्या पद्धतीने केले. निवृत्तीनंतर काय करावे, असा प्रश्न अनेकांना पडत असतो.

पण आराम करण्याच्या वयात वेगळे काहीतरी शिकायचे, अशी जिद्द बाळगणारे श्री. राठोड यांनी ‘आय पॅड’ शिकण्याचा संकल्प सोडला. ‘आय पॅड’च्या माध्यमातून त्यांनी गणेशाचे डिजिटल पोर्ट्रेट साकारले आहे. (Art teacher Dattaji Rathore created Ganesh with iPad Latest Marathi News)

कोरोना महामारीच्या काळात दोन वर्षे घरी बसलेले असताना श्री. राठोड ‘आय पॅड’ शिकले. मुलगा कुणालने त्यांना नवीन ‘आय पॅड’ची भेट दिली. यू-ट्यूबच्या माध्यमातून त्यांनी शिकायला सुरवात केली. त्यांनी गणरायाचे स्वागत करण्यासाठी वेगवेगळ्या प्रकारची सुंदर डिजिटल पोर्ट्रेट तयार केली आहेत.

आजच्या पिढीला ही कला समजली पाहिजे, यासाठी ते दोन्ही मुलांना शिकवत आहेत. वयाच्या ६५ व्या वर्षी ‘आय पॅड’ हातात घेतलेले श्री. राठोड डिजिटल उपकरणांमुळे चित्रे खूप आकर्षित होतात, हे स्वानुभवातून सांगतात.