नाशिक : (मुल्हेर) येथील नातेसंबंध असलेल्या दोन कुटुंबीयांत शुक्रवारी (ता. ४) रात्री साडेदहाला झालेल्या बाचाबाचीचे रूपांतर हाणामारीत झाले. केदा पवारांवरील हल्ला रोखण्यासाठी दिनेश आडवा आला. वाचा पुढे काय घडले?

अशी आहे घटना

मुल्हेर येथील नातेसंबंध असलेल्या दोन कुटुंबीयांत शुक्रवारी (ता. ४) रात्री साडेदहाला जोरदार भांडण झाले. केदा भिका पवार हे मोठे बंधू गोविंद यांच्यासमवेत एकत्र कुटुंबात राहतात. तर त्यांचे नातेवाईक मामेभाऊ हिरामण व चिंतामण पडाळकर यांच्यात लग्नाच्या कारणावरून भांडण होऊन त्याचे रूपांतर हाणामारीत झाले. यात केदा पवार यांच्या घरी येऊन त्यांच्यावर हिरामण, चिंतामण पडाळकर यांनी त्यांच्या इतर साथीदारांसह चाकू, लोखंडी रॉड व लाकडी दांडक्यांनी हल्ला चढविला. त्यात हिरामणने केदा यांच्या डोक्यात लोखंडी रॉड घातला. यातून ते सावरत नाही तोच चिंतामणने केदा यांच्या पोटात व छातीवर चाकूने वार केल्याने केदा पवार कोसळले. या वेळी गोविंद पवारांचा मुलगा दिनेश काकाला वाचविण्यासाठी आडवा आला असता त्याच्या पृष्ठभागावर चाकूचा वार लागल्याने तोही जखमी झाला. यामुळे आरडाओरड झाल्याने हिरामण व चिंतामण दोघेही त्यांच्या साथीदारांसह फरारी झाले.

हेही वाचा > गोणीतून चिमुरड्याचा आवाज येताच ते थबकले...अमानवीय घटनेने नागरिकांत संताप

अकरा लोकांवर गुन्हा दाखल
 
केदा पवार व दिनेश पवार यांना सरकारी दवाखान्यात नेले असता केदा पवार यांचा मृत्यू झाला. दिनेश यांच्यावर उपचार करण्यात आले. रात्री पोलिसांना माहिती मिळताच पोलिसांनी घटनास्थळी धाव घेतली. केदा पवार यांचा मुलगा चिरंजीवी पवार यांच्या फिर्यादीवरून अकरा लोकांवर गुन्हा दाखल झाला असून, त्यात जानकाबाई पडाळकर, हिरामण पडाळकर, सोनी पडाळकर, चिंतामण पडाळकर, राणी पडाळकर, महादू पडाळकर, भावडू पडाळकर, सोमनाथ पडाळकर, राकेश पडाळकर, छोटीबाई पडाळकर यांचा समावेश आहे. सर्व संशयितांना पोलिसांनी ताब्यात घेतले आहे. तर केदा पवार यांच्यावर पोलिस बंदोबस्तात अंत्यसंस्कार झाले.  

हेही वाचा >  ब्रेकिंग : रस्त्यावर प्रसुती झालेल्या बाळंतीण महिलेवर डॉक्टरचा दबाव; "महिला रुग्ण व डॉक्टर" मधील वादग्रस्त संभाषणाचा VIDEO व्हायरल

संपादन - किशोरी वाघ