मालेगाव : शहरातील पोलिस कवायत मैदानावरील मुख्य शासकीय ध्वजारोहण सोहळ्यात छायाचित्रण, सीसीटीव्ही सेवा पुरवठादार ठेकेदाराने आत्मदहनाचा प्रयत्न केल्याने खळबळ उडाली.

कोरोना संसर्गकाळात कायदा सुव्यवस्था राखण्यासाठी वेगवेगळ्या सुविधा, वाहने तसेच पोलिसांना भोजन पुरविणाऱ्या ठेकेदारास दोन वर्षाचा कालावधी उलटूनही ९३ लाख ९५ हजार ५४७ रुपयांचे थकीत बिल वारंवार मागणी करूनही मिळाले नाही. यामुळे संतप्त झालेल्या ठेकेदाराने आज ध्वजारोहण प्रसंगी अंगावर ज्वलनशील पदार्थ टाकून आत्मदहनाचा प्रयत्न केला. या सेवा पुरवठादार ठेकेदारांनी कामाची बीले न मिळाल्यास आत्मदहनाचा इशारा दिला होता. आज सकाळी राजू मोरे यांनी आत्मदहनाचा अयशस्वी प्रयत्न केला. हा प्रकार जवळच उभ्या असलेल्या नागरिकांच्या लक्षात आला. त्यांनी आरडाओरड करताच पोलिसांनी धाव घेत आत्मदहनाचा प्रयत्न करणाऱ्या ठेकेदाराला रोखले. यामुळे येथे गोंधळ उडाला.

कोरोनासंसर्गात बंदोबस्तासाठी आलेल्या पोलिसांच्या भोजनासह शहरात अंतर्गत वहातुक, वाहने, मंडप, लाईट ,ध्वनीक्षेपक, पाणी, सीसीटीव्ही अशा विविध सुविधा पुरविण्याचा ठेका राजू मोरे व अन्य पुरवठादार यांना देण्यात आला होता. या सुविधांसाठी मोरे यांनी 93 लाख 95 हजार 547 रुपयांचे बिल जमा केले होते. वाहनधारकांचे सुमारे १३ लाखांचे बील थकीत आहे. दोन वर्ष उलटूनही बील मिळत नसल्याने सर्व पुरवठादार आर्थिक विवंचनेत असून त्रस्त झाले आहेत. त्यातून हे पाऊल उचलले असे श्री. मोरे यांनी सांगितले.