Sudhakar Badgujar : मुंबई बॉम्बस्फोटातील आरोपी सलीम शेख ऊर्फ सलीम कुत्ता यांच्यासमवेतचे नृत्य व लाचलुचपत विभागाने शिवसेनेच्या उबाठा गटाचे महानगरप्रमुख सुधाकर बडगुजर यांच्यावर दाखल गुन्ह्याच्या पार्श्वभूमीवर महापालिकेकडून पोलिस व शासनाने बडगुजर ॲन्ड कंपनीची माहिती मागवली आहे.

त्याअनुषंगाने पाणीपुरवठा विभागांसह बांधकाम विभागाने माहितीची जुळवाजुळव सुरू केली आहे. बडगुजर ॲन्ड कंपनीला आतापर्यंत दिलेले काम व झालेली आर्थिक उलाढाल याची माहिती पोलिसांना सादर केली जाणार आहे. (Badgujar company asked for a list of works done nashik news)

नागपूरच्या हिवाळी अधिवेशनामध्ये सलीम कुत्ता सोबतचे व्हिडिओ सभागृहात दाखवत आमदार नीतेश राणे यांनी बडगुजर यांच्यावर कारवाई करण्याची मागणी केली होती. त्याअनुषंगाने गृहमंत्री देवेंद्र फडणवीस यांनी एसआयटी चौकशी प्रस्तावित केली. त्या दिशेने पोलिसांनी तपास सुरू केला आहे.

पोलिसांचा तपास सुरू असतानाच दुसरीकडे लाचलुचपत प्रतिबंधक विभागाने बडगुजर ॲन्ड कंपनीने महापालिकेच्या एका टेंडर संदर्भात गुन्हा दाखल केला आहे. बडगुजर यांचा कंपनीशी संबंध असल्याचा आरोप करण्यात आला आहे.

सलीम कुत्ता संदर्भातील व्हिडिओ तसेच लाचलुचपत विभागाने दाखल केलेल्या गुन्ह्याच्या अनुषंगाने महापालिकेला प्राप्त झालेल्या सूचनेनुसार बांधकाम विभाग व पाणीपुरवठा विभागाकडून बडगुजर ॲन्ड कंपनीने केलेल्या कामांची यादी मागविण्यात आल्याची माहिती सूत्रांनी दिली.

महायुतीच्या नेत्यांकडूनही पत्र

महायुतीच्या नेत्यांनीही बडगुजर यांच्याशी संबंधित असलेल्या कामांकडे अंगुलिनिर्देश करत आयुक्तांना पत्र सादर केले आहे. त्या पत्रात बडगुजर यांनी केलेल्या व्यवहारांची चौकशी करण्याची मागणी केली असून, बडगुजर ॲन्ड कंपनीशी संबंधित असलेले कागदपत्रे तसेच बांधकाम विभागाकडे रजिस्टर झालेल्या कंपन्यांची माहिती मागविण्यात आली आहे.