Sudhakar Badgujar Fraud Case : महापालिकेच्या विविध कामांचा ठेका घेत नगरसेवक पदाचा दुरुपयोग केल्याप्रकरणी गुन्हा दाखल असलेले शिवसेनेच्या उबाठा गटाचे महानगरप्रमुख सुधाकर बडगुजर हे अंतरिम जामीन सुनावणीवेळी मंगळवारी (ता.९) न्यायालयात गैरहजर राहिले.

त्यावर ‘लाचलुचपत’ प्रतिबंधक विभागाकडून आक्षेप घेण्यात आल्याने बडगुजर यांच्यासह दोघांना १७ तारखेला न्यायालयात हजर राहण्याचे आदेश देण्यात आले आहेत. (Badgujar ordered to appear in court nashik news)

सुधाकर भिका बडगुजर, साहेबराव रामदास शिंदे, सुरेश भिका चव्हाण या तिघांविरोधात सरकारवाडा पोलिसात अपहारप्रकरणी गुन्हा दाखल करण्यात आला आहे. त्यासंदर्भात लाचलुचपत प्रतिबंधक विभागाने त्यांना चौकशीसाठी बोलाविले असता, बडगुजर यांनी जिल्हा न्यायालयात धाव घेत अंतरिम जामीन मिळविला होता.

या अंतरिम जामिनाची मुदत मंगळवारी (ता.९) संपल्याने सदरचा अंतरिम जामीन नियमित करण्यासाठी न्यायालयात सुनावणी होती. परंतु यावेळी सुधाकर बडगुजर यांच्यासह तिघेही न्यायालयात गैरहजर होते. त्यावर सरकार पक्षाचे विशेष सरकारी वकील पंकज चंद्रकोर यांनी आक्षेप नोंदविला.

तसेच लाचलुचपत प्रतिबंधक विभागाचे तपासी अधिकारी विश्वजित जाधव यांनीही युक्तिवाद केला. त्यामुळे न्यायालयाने अंतरिम जामीन नियमित न करता तिघा संशयितांना येत्या १७ तारखेला न्यायालयात हजर राहण्याचे आदेश बजावले आहेत.

२०१६ मध्ये तत्कालीन महापालिका आयुक्त डॉ. प्रवीण गेडाम यांनी याप्रकरणी लाचलुचपत प्रतिबंधक विभागाकडे तक्रार केली होती. या तक्रार अर्जांची ‘लाचलुचपत’च्या पथकाने खुली चौकशी करून तपासाअंती १७ तारखेला गुन्हा दाखल केला आहे. यात बडगुजर यांच्यासह तिघांना अंतरिम जामीन मंजूर करीत दिलासा मिळाला होता.