नाशिक : व्यवसायाची उधारीची रक्कम वसुल करून मोपेडवरून विहितगाव रस्त्याने परतत असताना पाठीमागून कारमधून आलेल्या संशयितांनी कट मारला. त्यानंतर कारमधील एकाने मोपेडस्वाराच्या डोक्यावर कोयत्याने वार केला.

सुदैवाने हेल्मेट असल्याने बचावले मात्र त्यांच्याकडील दीड लाखांची रोकड व ३ लाखांचे धनादेश बळजबरीने संशयितांनी हिसकावून नेले. सदरील घटना गेल्या सोमवारी (ता.१८) रात्री घडली असून, याप्रकरणी उपनगर पोलिसात गुन्हा दाखल करीत संशयितांचा पोलीस कसून शोध घेत आहेत. (beat and robbed one by ax Incident Vihitgaon Road Suspect escapes from car Nashik Crime)

प्रकाश बन्सी मरसाळे (४१, रा. विहितगाव) असे गंभीर जखमी झालेल्या कामगाराचे नाव असून, त्यांना उपचारासाठी घोटीच्या एसएमबीटी रुग्णालयात दाखल करण्यात आले आहे.

संतोष चिंतामण आहिरे (रा. सौभाग्यनगर, लॅमरोड, विहितगाव) यांच्या फिर्यादीनुसार, त्यांची तेल एजन्सी असून, मरसाळे हे त्यांच्याकडे कामाला आहेत.

शहरात अनेक व्यावसायिकांना तेल पुरविले जाते. यासंदर्भातील वसुली करण्यासाठी मरसाळे हे त्यांच्या मोपेडने अंबड, सिडको, सातपूर या परिसरातील व्यावसायिकांकडे गेले होते.

वसुलीचे १लाख ६८ हजार रुपये रोख व ३ लाख रुपयांचे धनादेश घेऊन ते सोमवारी (ता.१८) रात्री दहा-साडेदहाच्या सुमारास विहितगावकडे परतत होते. ते साईलॉन्ससमोर असताना, त्यांच्या मोपेडला पाठीमागून आलेल्या कारने कट मारला.

त्यानंतर कार आडवी लावून मरसाळे यांना रोखले. कारमधील चौघांपैकी एक संशयित हातात कोयता घेऊन बाहेर आला आणि त्याने मरसाळे यांच्या डोक्यात वार केला. हेल्मेट असल्याने ते बचावले परंतु संशयिताने पुन्हा वार केला.

तसेच त्यांच्या गळ्यातील रोकड व धनादेश असलेली बॅग बळजबरीने हिसकावून संशयितांनी पोबारा केला. घटनेची माहिती मिळताच संतोष आहिरे घटनास्थळी दाखल झाले.

जखमी मरसाळे यांना एसएमबीटी रुग्णालयात दाखल केले. याप्रकरणी उपनगर पोलिसात जबरीलुटीचा गुन्हा दाखल करण्यात आला आहे. सहायक निरीक्षक महाजन तपास करीत आहेत.