इगतपुरी (जि. नाशिक) : प्रधानमंत्री सिंचन योजनेतून बांधण्यात आलेल्या इगतपुरी तालुक्यातील काळुस्ते शिवारातील भाम धरण (Bham dam) सलग तिसऱ्या वर्षी ओव्हरफ्लो झाले आहे. या धरणाच्या पाणलोट क्षेत्रात पाऊस होत असला, तरी या वर्षी पाऊस कमी झाल्याने धरण भरण्यास जवळपास १५ दिवसांचा विलंब झाला. दरम्यान, धरण ओव्हरफ्लो झाल्याने परिसरात आनंद व्यक्त होत असून, तालुक्याबरोबरच जिल्ह्याबाहेरही दिलासा मिळणार आहे.

भाम धरण निसर्गरम्यस्थळी आहे. गेल्या तीन वर्षांपूर्वी प्रधानमंत्री सिंचन योजनेतून या धरणाची उभारणी करण्यात आली आहे. भावली धरणापाठोपाठ (Bhavli Dam) दोन- चार दिवसांत भाम धरूनही ओसंडून वाहते. मात्र, या वर्षी तालुक्यातही पावसाने चांगलीच उघडीप दिल्याने हे धरूनही संथ गतीने भरण्याचा मार्गक्रमण करीत होते. अडीच टीएमसी क्षमतेचे हे धरण केव्हा ओसंडून वाहते, याकडे संपूर्ण तालुक्याचे लक्ष लागून होते. शनिवारी (ता. २१) पहाटेपासून धरण पूर्ण क्षमतेने भरून सांडव्यावरून पाणी ओसंडून वाहू लागले.

गावांची तहान भागविणारे धरण

भाम धरणात अडीच टीएमसी साठा झाला आहे. धरणातून भाम नदीपात्राने दारणा नदीमार्गे दारणा धरणात विसर्ग होणार असून, नदीलगतच्या शेती सिंचनासाठी हे धरण संजीवनी देणारे ठरणार आहे. या भागातील गावांची तहान भागविण्यासाठी हे धरण उपयुक्त ठरणार आहे. पाण्याअभावी काळुस्ते भागांतील अनेक गावांत पारंपरिक हंगामी भात पीक वर्षानुवर्षे घेतले जात होते. मात्र, या धरणामुळे भाताबरोबरच बागायती पिके घेण्याकडे शेतकऱ्यांचा कल वाढणार आहे. यामुळे आर्थिक सुबतत्ता देणारे हे धरण ठरणार असल्याचा विश्वास शेतकऱ्यांनी व्यक्त केला.

सलग तिन्ही वर्षी ओव्हरफ्लो

गेल्या तीन वर्षांपूर्वी बांधलेले भाम धरण सलग तिन्ही वर्षी ओव्हरफ्लो झाले आहे. गेल्या दोन्ही वर्षी आषाढी एकादशीलाच धरण भरल्याचा विक्रम झाला. या वर्षी मात्र १५ दिवस उशिरा धरण भरले. धरण उशिरा भरल्याने धरणातील जलसाठा स्थिर झाल्याने ओसंडून वाहणारे पाणी हे काचेसारखे नितळ असल्याने समाधन व्यक्त होत आहे.