Nashik Crime : दिंडोरी रोडवरील आरोग्य विज्ञान विद्यापीठाजवळ गोणीत कुजलेल्या अवस्थेत सापडलेल्या अज्ञात महिलेच्या मृतदेहाची ओळख पटली आहे.

सुलोचना उर्फ मोहन पवार असे मयत महिलेचे नाव असून तिच्या नातलगांमुळे ओळख पटली आहे. दरम्यान, तरीही नातलगांची ‘डीएनए’ चाचणी करण्यात येणार असल्याचे पोलिसांनी सांगितले.

मात्र, अद्यापही या महिलेच्या खुनाचे कारण स्पष्ट झालेले नाही. पोलिसांची तपासी पथके या खुनाचा उलगडा करण्यासाठी तपास करीत असून, काही पथके जिल्ह्याबाहेर रवाना झाली आहेत. (Body found in sack near University of Health Sciences identified mystery of murder still remains Nashik Crime)

गेल्या मंगळवारी (ता. २६) दिंडोरी रस्त्याने पायी जाणाऱ्या नागरिकांनी दुर्गंधी येत असल्याची माहिती दिली असता, रस्त्यालगत टाकलेल्या गोणी सुलोचना पवार यांचा कुजलेल्या अवस्थेतील मृतदेह आढळून आला हाेता.

सायंकाळी शवविच्छेदन अहवालानुसार महिलेचा गळा दाबून खून झाल्याचे स्पष्ट झाले. या मृतदेहाजवळ पिशवीत कपडे व भांडी होते. यासह मृतदेहाच्या गळ्यात एक पिवळ्या धातूच्या मण्यांचे मंगळसूत्र व कानात जोड आढळले आहे.

याप्रकरणी म्हसरूळ पोलिस ठाण्यात मृत महिलेची आई, भाऊ व मुलगा दाखल झाल्याची माहिती पोलिसांनी दिली. या नातलगांनी मृतदेह ओळखून तिचे नाव सुलोचना असल्याचे सांगितले. हे सर्वजण दिंडोरी तालुक्यातील मोहाडी येथील रहिवाशी आहेत.

दरम्यान, नातलगांनी पोलिसांनी दिलेल्या माहितीनुसार, मृत महिलेची यापूर्वीच दोन लग्ने झाली आहेत. दोन्ही नवऱ्यांनी मात्र तिच्याशी वैवाहिक संबंध तोडलेले आहेत. ती काहीशी वेडसर आणि सतत घर सोडून जात असल्याचे तिच्या नातलगांनी पोलिसांना सांगितले आहे.

मयत महिला ही फिरस्ती असल्याने तिचा खून का व कशासाठी करण्यात आला याबाबत अजून उलगडा झालेला नाही. नातलगांनी मृत महिलेची ओळख पटविली असली, तरी ‘डीएनए’ चाचणी करुन ओळख निश्चितीचा निर्णय पोलिसांनी घेतला आहे.