नाशिक : येथील जिल्हा रुग्णालयातील विशेष कक्षात रविवारी (ता. 15) कोरोनासदृश आजाराचे आणखी दोन रुग्ण दाखल झाले, तर यापूर्वीच दाखल असलेल्या चौघांचे रिपोर्ट अद्याप प्राप्त झालेले नसल्याने, या कक्षात सध्या सहा रुग्ण आहेत. दरम्यान, तीन-साडेतीन महिन्यांनंतर स्वाइन फ्लूसदृश एक रुग्णही दाखल झाला असून, या सर्वांचे अहवाल आज (ता. 16) सायंकाळपर्यंत प्राप्त होण्याची शक्‍यता आहे. सोमवारी राज्याचे अन्न व औषध प्रशासनमंत्री डॉ. राजेंद्र शिंगणे नाशिकमध्ये येत असून, सॅनिटायझर उत्पादकांची बैठक घेणार आहेत. 

स्वॅबचे नमुने तपासणीसाठी पुण्याच्या राष्ट्रीय विषाणू प्रयोगशाळेकडे
जिल्हा रुग्णालयात रविवारी परदेशातून आलेले आणखी दोघे दाखल झाले आहेत. यातील एक दुबईहून, तर दुसरा फिलिपीन्समधून आलेला आहे. त्यांच्या स्वॅबचे नमुने तपासणीसाठी पुण्याच्या राष्ट्रीय विषाणू प्रयोगशाळेकडे पाठविण्यात आले आहेत. सध्या कोरोना विषाणू विलगीकरण कक्षामध्ये दाखल असलेल्या सहा रुग्णांच्या स्वॅबच्या नमुन्यांचे अहवाल रविवारी सायंकाळपर्यंत प्राप्त झालेले नव्हते. पुण्याच्या राष्ट्रीय विषाणू प्रयोगशाळेत राज्यभरातून येणाऱ्या स्वॅबच्या नमुन्यांचा अतिरिक्त ताण वाढला असल्याने अहवाल मिळविण्यास विलंब होत आहे. 

82 जण आरोग्य यंत्रणेच्या देखरेखीखाली
नाशिकमध्ये आतापर्यंत एकही कोरोनाबाधित रुग्ण आढळला नसला, तरी परदेशातून आलेले 82 जण आरोग्य यंत्रणेच्या देखरेखीखाली आहेत. 14 दिवसांपर्यंत त्यांची नियमित आरोग्य तपासणी महापालिका व जिल्हा आरोग्य विभागाकडून केली जात असल्याचे जिल्हा शल्यचिकित्सक डॉ. सुरेश जगदाळे यांनी सांगितले. 

स्वाइन फ्लूसदृश रुग्णही दाखल 
गेल्या तीन ते साडेतीन महिन्यांपासून जिल्हा रुग्णालयातील स्वाइन फ्लू विशेष कक्ष बंद होता. कोरोना विषाणूचा प्रादुर्भाव वाढल्याने याच कक्षाचे कोरोना विषाणू विलगीकरण कक्षात रूपांतर करण्यात आले. मात्र, काही दिवसांपासून वातावरणातील बदलामुळे रविवारी स्वाइन फ्लूसदृश रुग्ण याच कक्षात दाखल करण्यात आला आहे. या रुग्णावर खासगी रुग्णालयात उपचार सुरू असताना, त्याचा स्वाइन फ्लूचा रिपोर्ट पॉझिटिव्ह आला आहे. तरीही त्याचे स्वॅबचे नमुने पुण्याच्या प्रयोगशाळेकडे पाठविण्यात आलेले आहेत. 

 क्लिक करा > VIDEO : जावईबापू म्हणतात.."मी गाढवावरून मिरवणार..सगळ्यांचीच जिरवणार" "शंभर वर्षांची प्रथा आहे हो!"

मंत्री डॉ. शिंगणे आज नाशिकमध्ये 
अन्न व औषध प्रशासन विभागाचे मंत्री डॉ. राजेंद्र शिंगणे सोमवारी नाशिकमध्ये येत आहेत. कोरोना विषाणू प्रादुर्भावाच्या पार्श्‍वभूमीवर विभागातील सॅनिटायझर उत्पादकांसमवेत ते सकाळी गोल्फ क्‍लब येथील शासकीय विश्रामगृहात बैठक घेणार आहेत. या बैठकीमध्ये ते सॅनिटायझरचा काळा बाजार रोखण्यासह नागरिकांना सहज उपलब्ध होतील याबाबत सूचना करणार आहेत. 

VIDEO : भयंकर प्रकार! निर्दयीपणे 'ते' तरुणाला भरचौकात मारत होते..अन् व्हिडीओ झाला व्हायरल..