Nashik Crime News : दोघांनी केलेल्या मारहाणीत विटभट्टी कामगार ठार झाला आहे. खुन करून प्रेत वाडीवऱ्हे पोलीस ठाण्याच्या हद्दीतील मुंढेगाव, अस्वली स्टेशन रस्त्यावरील गरुडेश्‍वर येथील मरी माता मंदिराजवळ फेकण्यात आले. (Brick kiln labourer died in beating nashik crime news)

याबाबत मृत मजूराच्या आईने दिलेल्या फिर्यादीवरून वाडीवऱ्हे पोलीस ठाण्यात गुन्हा दाखल झाला आहे. घोटी परिसरात वांगेवाडी येथील वीटभट्टीवर मजूर म्हणून कामाला असलेल्या संपत मधु मुकणे (वय ३४, मुळ रा. जोगलवाडी, ता. मोखाडा, जि. पालघर) यास संशयित बुधा रतन वळवी व शंकर रतन वळवी (दोघेही रा. वीटभट्टी, वांगेवाडी) या दोघांनी मिळून लाथा बुक्क्यांनी बेदम मारहाण केली.

हेही वाचा : What Is Moksha: ‘अण्णा तुमच्या गुरूला मिळाला का मोक्ष?’

यात संपत मुकणे याचा जिव्हारी मार लागल्याने मृत्यू झाला. त्यानंतर संशयितांनी त्याचा मृतदेह गरुडेश्‍वर शिवारातील मरीमाता मंदिराजवळ फेकून पुरावा नष्ट करण्याचा प्रयत्न केला. या प्रकरणी संपतची आई शांताबाई मधु मुकणे यांनी वाडीवऱ्हे पोलीस ठाण्यात फिर्याद दिली आहे. घटनेचे गांभीर्य ओळखून पोलीसांनी तातडीने हालचाल करुन दोन्ही संशयितांना तत्काळ ताब्यात घेतले. अनैतिक संबधांच्या कारणातून हा खून झाल्याचा संशय आहे.

घटनेची माहिती मिळताच पोलीस अधीक्षक शहाजी उमाप यांच्या मार्गदर्शनाखाली पोलीस उपअधीक्षक कविता फडतरे, वाडीवऱ्हेचे वरिष्ठ पोलीस निरीक्षक अनिल पवार, उपनिरीक्षक सुनील बिऱ्हाडे, श्याम सोनवणे, प्रकाश गायकवाड आदींनी घटनास्थळी धाव घेतली. उपनिरीक्षक बिऱ्हाडे तपास करीत आहेत.