नाशिक : (पेठ) संचारबंदीच्या काळात एकाच दिवशी 70 गर्भवती महिलांना तपासणीकरिता बोलावून त्यांना सेंटरमध्ये दाटीवाटीने बसवून संचारबंदीच्या नियमाचा भंग केल्याप्रकरणी येथील सोनोग्राफी सेंटरला कारणे दाखवा नोटीस बजावण्यात आली आहे. या सेंटरला दुसऱ्यांदा या प्रकरणी नोटीस बजावण्यात आल्याने सेंटर वादाच्या भोवऱ्यात आले आहे. 

सोशल डिस्टन्सिंगचे नियम धांब्यावर

पेठ ग्रामीण रुग्णालयात सोनोग्राफी सेंटरची सुविधा नसल्याने प्राथमिक आरोग्य केंद्राकडून गर्भवती महिलांची शहरातील डॉ. रोहिणी सोनवणे यांच्या साईकिरण सोनोग्राफी सेंटरमधून तपासणी केली जाते. याकरिता सेंटरला शासनाकडून अनुदानदेखील मिळते. सोनोग्राफी सेंटरमध्ये एक दिवसाला केवळ 15 ते 20 गर्भवती महिलांची तपासणी होणे अपेक्षित असताना सेंटरच्या संचालिका डॉ. रोहिणी सोनवणे यांनी एकाच दिवशी 70 महिलांना तपासणीकरिता बोलावून त्यांना दाटीवाटीने सेंटरमध्ये बसविले. कोरोनाच्या पार्श्‍वभूमीवर सोशल डिस्टन्सिंगचे पालन करायचे सांगितले असतानादेखील या नियमांचा भंग केला. याबाबत नागरिकांनी याची माहिती तत्काळ प्रशासनास दिली असता तहसीलदार संदीप भोसले, मंडळ अधिकारी, नगर परिषदेचे मुख्याधिकारी, पोलिस प्रशासन आदींनी केंद्रास भेट देऊन पाहणी करीत कारणे दाखवा नोटीस बजावली. मात्र या आदेशाची अंमलबजावणी करण्यासाठी अधिकारी सेंटरला गेले असता डॉ. रोहिणी सोनवणे आणि त्यांच्या कर्मचाऱ्यांनी सेंटर बंद केले. यामुळे प्रशासनाकडून सोनोग्राफी सेंटरच्या दारावरच नोटीस चिकटवली. 

हेही वाचा > भरउन्हात रस्ता कापत सुरु 'त्यांचा' प्रवास...जीवाचा आटापीटा करत घराकडे जायची धडपड!...पण

सेंटरला दुसऱ्यांदा नोटीस 

पेठ येथील डॉ. रोहिणी सोनवणे यांच्या साईकिरण सोनोग्राफी सेंटरला ग्रामीण रुग्णालय अधीक्षकांकडून यापूर्वीदेखील कारणे दाखवा नोटीस बजावण्यात आलेली आहे. मात्र आता पुन्हा एकदा नगरपंचायत मुख्याधिकाऱ्यांनीदेखील नोटीस बजावल्याने हे सेंटर वादाच्या भोवऱ्यात अडकले आहे. 

हेही वाचा > 'इथं' बांधावरच होतेय कांदा खरेदी अन् विक्रीही...शेतकऱ्यांकडून देखील मिळतेय पसंती!