नाशिक/मालेगाव : मालेगावात सध्या कोरोना बाधितांची संख्या वाढत असल्याने मालेगाव परिसर रेड झोन आणि हॉटस्पॉट करण्यात आला आहे. अशातच प्रशासनाकडून युध्द पातळीवर कार्य केली जात असतांना धक्कादायक प्रकार समोर आला. आयुक्तांच्या धडक कारवाईत हा प्रकार समोर आल्याने त्याबाबत कठोर कारवाई करण्याचा इशारा आयुक्त त्र्यंबक कासार यांनी दिला आहे.  

डॉक्‍टर, मिश्रक, तंत्रज्ञ, इंजिनिअर, लिपिक यांचा समावेश 
 
कोरोना राष्ट्रीय आपत्तीत साथरोग अधिनियम लागू असताना, महापालिकेत कार्यरत असणारे 14 कर्मचारी आदेशानंतरही नियोजित ठिकाणी कामावर हजर न झाल्याने 14 कर्मचाऱ्यांवर गुन्हा दाखल केला आहे, अशी माहिती महापालिका आयुक्त त्र्यंबक कासार यांनी दिली. संबंधित महापालिकेच्या कर्मचाऱ्यांना गेल्या महिन्यापासून वारंवार भ्रमणध्वनी व व्हॉट्‌सऍपद्वारे कळवूनही ते कामावर हजर झाले नाहीत. त्यामुळे ही कारवाई करण्यात आली. त्यात सहा कायम व आठ मानधनावरील कर्मचाऱ्यांचा समावेश आहे. यातील तीन डॉक्‍टर आहेत, तर एक प्रयोगशाळा तंत्रज्ञ व दोन मिश्रकांचा समावेश आहे. उर्वरित मानधनावरील चार सहाय्यक कनिष्ठ अभियंता, दोन लिपिक-संगणकचालक व एक शिपाई यांचा समावेश आहे. 

हेही वाचा > हद्दपार गुंड शहरात राजरोस कसा फिरतो? अखेर विश्वास नांगरे पाटलांनी घेतली 'ही' अ‍ॅक्‍शन!

त्यांच्यावर भारतीय दंडसंहिता 1860 च्या कलम 188 अन्वये किल्ला पोलिस ठाण्यात गुन्हा दाखल झाला आहे. आयुक्तांच्या धडक कारवाईत यापूर्वी 33 व आताचे 14 अशा एकूण 47 कर्मचाऱ्यांवर गुन्हा दाखल झाला आहे. कर्तव्यात कसूर करणाऱ्या इतर सर्व कर्मचाऱ्यांवरही कठोर कारवाई करण्याचा इशारा आयुक्त कासार यांनी दिला आहे.  

हेही वाचा > बारा अन् सोळा दिवसाचे बच्चे रियल फायटर्स! अखेर केलेच कोरोनाला चितपट..