नाशिक : मखमलाबाद रोड वर वैद्यकिय ज्ञान नसतांना घरीच मुलीवर उपचार करुन तिच्या मृत्युस कारणीभूत ठरल्याबद्दल मुलीच्या पित्यावरच गुन्हा दाखल झाला आहे.

हेमंत भारत शेटे (वय ३५, शिवगणेश अपार्टमेंट विठ्ठल रुक्मीणी मंगल कार्यालय मखमलाबाद रोड) असे संशयित पित्याचे नाव आहे. त्यांनी घरच्या घरीच त्यांच्या रिया (वय १४) या स्वतःच्या मुलीवर पुरेसे वैद्यकिय ज्ञान नसतांना उपचार केले. पोलिसांनी दिलेली माहीती अशी की, पंचवटीतील मखमलाबाद रोड येथील शिवगणेश अपार्टमेंटमध्ये अलका व हेमंत भारत शेटे हे मुलगी रिया हिच्यासह रहायला आहे. काही दिवसांपासून त्यांची मुलगी रिया आजारी असल्याने तिच्यावर वैद्यकिय उपचार सुरु होते. थोडे बरे वाटल्यावर मुलीला घरी आणल्यानंतर पुन्हा तिची प्रकृती बिघडल्यानंतर तिचे वडील हेमंत यांनी गुरुवारी (ता.२१) दुपारी एकला घरच्या घरी सलाईन देत उपचार केल्याने त्यात तिचा मृत्यु झाल्याची मुलीच्या आईची तक्रार आहे.

हेमंत यांनी घरच्या घरी रिया हिला सलाईन व त्यात इंजेक्शन दिल्याने तिचा मृत्यु झाला असा संशयिताची पत्नी व मुलीची आई अलका शेटे याची तक्रार दिली असून याप्रकरणी त्यांनी पतीविरोधात दिलेल्या तक्रारीवरुन पंचवटी पोलिस ठाण्यात वैद्यकिय ज्ञान आणि औषधोपचाराचा अनुभव नसतांना उपचार करुन मुलीच्या मृत्युला कारणीभूत ठरल्याचा गुन्हा दाखल झाला आहे. या प्रकरणाचा पोलिस उपनिरीक्षक पी .ए. नेमाने तपास करीत आहे.