नाशिक : अभियांत्रिकी, औषध निर्माणशास्‍त्र व बी.एस्सी. (कृषी) या अभ्यासक्रमांच्‍या प्रवेशासाठी एमएचटी-सीईटी परीक्षा घेण्यात आली होती. मात्र, काही कारणास्‍तव परीक्षेपासून मुकलेल्‍या विद्यार्थ्यांकरिता अतिरिक्‍त सत्र होणार आहे. त्‍यासाठी नोंदणी करण्याचे आवाहन विद्यार्थ्यांना केले होते. यानंतर सीईटी सेलतर्फे अतिरिक्‍त सत्राच्‍या तारखेची घोषणा केली असून, शनिवारी (ता. ७) दोन सत्रांमध्ये ही परीक्षा घेतली जाणार आहे. 

परीक्षेपासून मुकलेल्‍या विद्यार्थ्यांना संधी

ऑक्‍टोबरच्या ९ तारखेपर्यंत भौतिकशास्‍त्र, रसायनशास्‍त्र आणि जीवशास्‍त्र (पीसीबी) या ग्रुपची परीक्षा घेण्यात आली, तर १२ ते १९ ऑक्‍टोबरदरम्‍यान भौतिकशास्‍त्र, रसायनशास्‍त्र आणि गणित पीसीएम ग्रुपची परीक्षा झाली. संगणकावर आधारित या परीक्षेपासून विविध कारणांमुळे मुकलेल्‍या विद्यार्थ्यांना संधी देण्यासाठी सीईटी सेलने अतिरिक्‍त सत्र घेण्याचे जाहीर केले होते. या अतिरिक्‍त सत्रात सहभागी होऊन परीक्षा देऊ इच्‍छिणाऱ्या विद्यार्थ्यांना ऑनलाइन नोंदणी व शुल्‍क भरण्याच्‍या सूचना केल्‍या होत्‍या. 

हेही वाचा > धक्कादायक! रक्षकच जेव्हा भक्षक बनतो तेव्हा; पोलिस पतीसह पाच जणांकडून पत्नीचा छळ

दोन सत्रांमध्ये परीक्षा

सीईटी सेलने अतिरिक्‍त सत्राच्‍या तारखेची घोषणा केली आहे. त्‍यानुसार शनिवारी पहिल्‍या सत्रात सकाळी नऊ ते दुपारी बारा या वेळेत पीसीबी ग्रुपची, तर दुपारच्‍या सत्रात अडीच ते सायंकाळी साडे पाच या वेळेत पीसीएम ग्रुपची परीक्षा घेतली जाईल. या सत्रांतून परीक्षा देऊ इच्‍छिणाऱ्या विद्यार्थ्यांना मंगळवारी (ता. ३) प्रवेशपत्र संकेतस्‍थळावर उपलब्‍ध केले जाणार होते. आपल्‍या लॉगइन आयडी व पासवर्डच्‍या सहाय्याने विद्यार्थ्यांना हे प्रवेशपत्र प्राप्त करून घेता येणार आहेत. परीक्षा केंद्र, प्रवेशाची वेळ व अन्‍य तपशील प्रवेशपत्रावर नमूद केलेला आहे, असे सीईटी सेलतर्फे स्‍पष्ट केले आहे. 

हेही वाचा > ह्रदयद्रावक! अखेरच्या क्षणीही मैत्रीचा घट्ट हात कायम; जीवलग मित्रांच्या एकत्रच निघाल्या अंत्ययात्रा