नाशिक : (चांदवड) तालुक्‍यातील शेतकऱ्यांच्या कांद्याचे नुकसान होऊ नये, कांदा विक्रीसाठी गैरसोय होऊ नये, यासाठी शेतकऱ्यांनी बाजार समितीतील कांदा व्यापाऱ्यांशी संपर्क करून व्यापाऱ्यांच्या खळ्यांवर कांदा विक्रीस आणावा, असे आवाहन चांदवड बाजार समितीचे अध्यक्ष डॉ. आत्माराम कुंभार्डे व बाजार समिती प्रशासनाने केले आहे. 

सोशल डिस्टन्सिंग व तोंडाला मास्क आवश्यक

चांदवड शहरात कोरोनाबाधित रुग्ण आढळून आलेला भाग कटेन्मेंट झोन, तसेच त्यालगत असलेल्या परिसराला बफर झोन घोषित केले आहे. त्यावरून शुक्रवारी (ता. 17) बाजार समितीचे संचालक व कांदा व्यापारी असोसिएशनची बैठक झाली. तीत शेतकऱ्यांची शेतमाल विक्रीसाठी गैरसोय होऊ नये. तसेच जीवनावश्‍यक वस्तूंचा पुरवठा सुरळीत राहावा, यासाठी बाजार समितीच्या आवारात लिलाव न करता पुढील निर्णय होईपर्यंत शेतकऱ्यांनी थेट व्यापाऱ्यांशी संपर्क करून व्यापाऱ्यांच्या खळ्यावर कांदा विक्री करावा, असे ठरविण्यात आले. कांदा विक्री सोमवार ते शनिवारी दैनंदिन सकाळी दहा ते सायंकाळी सहा या वेळेतच सुरू राहील. शेतकऱ्यांनी व्यापाऱ्यांशी चर्चा करून कांदा लिलाव करावा व भाव ठरवावा. शेतकऱ्याला योग्य वाटल्यास त्यांनी त्या व्यापाऱ्यास कांदा विक्री करावा अन्यथा इतर व्यापाऱ्याशी चर्चा करावी. कांदा विक्रीस आणल्यानंतर शेतकऱ्यांनी डिस्टन्सिंग व तोंडाला मास्क व रुमाल बांधावा. 

हेही वाचा > बापरे! क्वारंटाईन केले होते परप्रातिंयांना..भल्या पहाटे ४ जण पळालेच कसे? पोलीसही संभ्रमात

देखरेख करण्यासाठी अधिकारी व कर्मचारी नियुक्त करणार

बाजार समितीतर्फे प्रत्येक व्यापारी खळ्यावर मापारी काटा पट्टी बनविण्यासाठी व कांदा खाली करण्यासाठी हमाल राहतील. या सर्व व्यवहारावर बाजार समिती देखरेख करण्यासाठी अधिकारी व कर्मचारी नियुक्त करणार आहे. कांदा विक्रीसंदर्भात काही अधिक माहितीसाठी बाजार समितीशी संपर्क साधावा. सर्व शेतकऱ्यांनी कांदा विक्रीची रक्कम रोख अथवा आरटीजीएसद्वारे त्याच दिवशी घ्यावी. कोरोनाच्या पार्श्‍वभूमीवर शेतकरी, व्यापारी, हमाल-मापारी आदींनी योग्य ती खबरदारी घेऊन बाजार समितीस सहकार्य करावे, असे आवाहन चांदवड बाजार समितीचे अध्यक्ष डॉ. कुंभार्डे, उपसभापती नितीन आहेर व संचालकांनी केले आहे.  

हेही वाचा > Lockdown : घरच्या ओढीने काठीचा आधार घेत 'या' पठ्ठ्याने कापले अडीचशे किलोमीटरचे अंतर!