नाशिक : २००८ मध्ये गोदावरीसह उपनद्यांना आलेल्या पुरामुळे पाटबंधारे विभागाने आखून दिलेली निळी व लाल रेषा नंदिनी नदीसाठी बदलण्यात आल्याने शेतकरी संतप्त झाले आहे.

पूररेषेचे सर्वेक्षण करून सर्वांना एकाच वेळी न्याय अपेक्षित असताना जलसंपदा खाते व महापालिकेच्या नगररचना विभागाने बिल्डर व गुंतवणूकदारांच्या हितासाठी निर्णय घेतल्याचा आरोप शेतकरी कृती समितीने केला.

यासंदर्भात शिवसेनेच्या ठाकरे गटाचे महानगरप्रमुख सुधाकर बडगुजर यांना निवेदन देण्यात आले. (Change in flood line of Nandini river farmers angry Nashik News)

नासर्डी नदी किनारी मोठ्या प्रमाणात शेतजमीन आहे. परंतु बांधकाम व्यावसायिकांच्या हिताचा विचार करून नंदिनी नदीची पूररेषा छोटी केली. नदीची लांबी १४ किलोमीटर आहे.

२००६ पूर्वी नंदिनी नदीवर मोठ्या प्रमाणात पूल व बंधारे असल्याने जलसंपदा विभागाने सर्वेक्षण करून शेत जमिनींवर पूररेषा टाकली. एकीकडे पूररेषा टाकताना नदीवरील छोटे पूल व बंधारे हटविले.

पुराचे प्रमाण घटल्याने पूररेषादेखील कमी झाली. त्यामुळे पूररेषा हटवायची असेल तर सरसकट पूररेषा कमी करण्याऐवजी बांधकाम व्यावसायिकांच्या हिताचा विचार करून सातपूर गावातील दोन किलोमीटर अंतरावरीलच पूररेषा कमी केली.

छोट्या शेतकऱ्यांचे शेत बाधित होणारे क्षेत्र पूर्वीच्याच पूररेषेप्रमाणे ठेवले आहे. याचा अर्थ त्या शेतकऱ्यांना पूररेषेच्या क्षेत्रात कुठलेच काम करता येणार नाही.

महापालिका, जलसंपदा विभागाने नंदिनी नदी लगतच्या पूररेषेचे पुन्हा एकदा सर्वेक्षण करावे, अशी मागणी शेतकऱ्यांनी निवेदनाद्वारे केली आहे.

गोकुळ निगळ, सुनील मौले, शांताराम निगळ, दशरथ निगळ, वाळू निगळ, राजू निगळ, निवृत्ती काशीब्रे, संपत घाटोळ, सुरेश गोवर्धने, गिरीश गोवर्धने, राकेश काशीभ्रे, रूपचंद गोवर्धने, संतोष निगळ, राजाराम निगळ यांनी निवेदन दिले.

या सर्वे क्रमांकात झाले बदल

उजव्या तीरावरील : ३५९, ३६०, ३६१, ३६२, ३६३, ४०९, ४१०, ४११, ४१२, ४१३, ४१४, ४१७, ४१८, ४१९, ४२०, ४२४, ४२५, ४२९, ४३०, ४६१, ४६२, ४६४, ४६६, ४६७.

डाव्या तीरावरील : ४६८, ४६९, ४७३, ४७४, ४७५, ४७६, ४७७, ५२४, ५२५, ५३०, ५३१, ५३३, ५३४.