Chhagan Bhujbal News : राज्यातील १२ जिल्ह्यांच्या पालकमंत्र्यांची सुधारित यादी जाहीर झाली आणि त्यात नाशिकसह रायगडचा समावेश नाही. नाशिक जिल्ह्यात राष्ट्रवादी काँग्रेसचे ६ आणि पूर्वीचे आमचे इगतपुरी-त्र्यंबकेश्‍वरचे आमदार हिरामण खोसकर असे ७ आमदार आहेत. (Chhagan Bhujbal statement about nashik guardian minister post claim news)

त्यामुळे सर्वाधिक आमदार आमचे असल्याने नाशिकच्या पालकमंत्रीपदावर आणि रायगडमध्ये आमचे खासदार असल्याने कोकण विभागातील एका जिल्ह्यातील पालकमंत्रीपदावर आमचा ‘क्लेम' आहे, असे राज्याचे अन्न व नागरी पुरवठा मंत्री छगन भुजबळ यांनी स्पष्ट केले.

मुंबईत पत्रकारांशी संवाद साधताना भुजबळ म्हणाले, की आमच्या अगोदर मुख्यमंत्र्यांच्या गट भारतीय जनता पक्षासोबत राज्याच्या सत्तेत सहभागी झाला आहे. आम्ही नंतर सत्तेत समाविष्ट झालो.

त्यामुळे अगोदर पालकमंत्रीपदाची जबाबदारी दिली, त्यांची समजूत काढणे आणि आमच्याकडे पालकमंत्रीपद देण्याच्या प्रक्रियेत वेळ जातो आहे. सामंजस्याच्या भूमिकेतून, चर्चेतून मार्ग निघतात. चर्चा सुरु आहे. पण मी चर्चेत नाही. मार्ग कधी निघेल तेंव्हा निघेल, जनतेचे काहीही अडलेले नाही.

वडाची साल पिंपळाला नकोय

ओबीसींसाठी आवाज उठवत असल्याने पालकमंत्रीपद देण्यात अडचण येते काय? या पत्रकारांच्या प्रश्‍नाला उत्तर देताना भुजबळ म्हणाले, की पालकमंत्रीपद आणि ओबीसी यात काहीही संबंध नाही. मुळातच, किती पालकमंत्री ओबीसींच्या बाजूने उभे राहतात. गेल्या ३५ वर्षांपासून आम्ही ओबीसींसाठी भांडत आहोत. त्यामुळे वडाची साल पिंपळाला लावण्यात अर्थ नाही.

निवडणूक आयोग योग्य घेईल निर्णय

खासदार सुप्रिया सुळे काय म्हणाल्यात, त्या निवडणूक आयोगापुढे काय मांडणार आहेत, हे मला माहिती नाही. ज्येष्ठ नेते शरद पवार यांनी कायदेशीर लढाईत जाणार नाही, असे म्हटले होते. त्यांनी कायदेशीर मार्गाने नोटिसा दिल्या. इकडून त्यांना नोटिसा देण्यात आल्या. शिवाय पक्षात वाद निर्माण होतात, तेंव्हा निवडणूक आयोगाला सुनावणी घ्यावी लागते. निवडणूक आयोग योग्य तो निर्णय घेईल, असेही भुजबळ यांनी सांगितले.