नाशिक : नाशिक-मुंबई राष्ट्रीय महामार्गाची (National Highway) पावसाळ्यात (Monsoon) दुर्दशा होते. या मार्गावरील रस्ते निकृष्ट असल्याने जनतेला मोठ्या अडचणींना सामोरे जावे लागते. त्यामुळे रस्त्यांची प्रलंबित कामे यंत्रणांनी तत्काळ मार्गी लावावीत, असे आदेश पालकमंत्री छगन भुजबळ (Chhagan Bhujbal) यांनी दिले. मंत्रालयात गोंदे ते वडपे आणि वडपे ते ठाणे परिसरातील रस्त्यांच्या कामासाठी झालेल्या बैठकीत ते बोलत होते. (chhagan Bhujbal statement on Nashik Mumbai highway pending works Nashik News)

बैठकीला भारतीय राष्ट्रीय महामार्ग प्राधिकरणाचे नाशिकचे सरव्यवस्थापक बी. एस. साळुंखे, वाहतूक व्यवस्थापक डी. आर. पटेल, महाराष्ट्र राज्य रस्ते विकास महामंडळाचे अभियंता आर. ए. डोंगरे, मुंबई-नाशिक एक्सप्रेस वे लिमिटेडचे सरव्यवस्थापक ए. एस. सुमेश, श्रीमती वसुंधरा आदी उपस्थित होते.

श्री. भुजबळ म्हणाले, की सर्व रस्ते वाहतूक तसेच कार्यान्वयीन यंत्रणांनी आपल्या कामात समन्वय ठेवावा. वडपे ते ठाणे या परिसरात वाहतूक कोंडीला सामोरे जावे लागते. स्थानिक यंत्रणांनी आपल्या कार्यक्षेत्रातील कामांची स्वत: पाहणी करावी व कामांना गती द्यावी. वारंवार खराब होणाऱ्या रस्त्यांचे काँक्रिटीकरण करण्यात यावे. जेणेकरून वाहतूक विनाअडथळा सुरळीत सुरू राहील. आगामी दहा वर्षात होणारे रस्ते आणि परिसरातून करण्यात येणाऱ्या रस्त्यांचे नियोजन सर्व रस्ते विकास यंत्रणांनी आतापासून करावे. शिवाय खड्ड्यांमुळे महामार्गावर पावसाळ्यात मोठा मनस्ताप नागरिकांना सहन करावा लागतो. त्यामुळे पावसाळ्यापूर्वी पावसाळ्यात येणाऱ्या अडचणी आणि समस्यांसाठी संबंधित यंत्रणांनी तयारी ठेवावी. रस्त्यावर खड्डे पडणार नाही, याची खबरदारी घ्यावी.