ओझर (जि. नाशिक) : तृतीयपंथी म्हटले की, बहुसंख्य तिरस्कारातूनच त्यांच्याकडे पाहतात. त्यामुळे सर्वसामान्य माणसांप्रमाणे त्यांना वागणूक मिळत नाही. कुणी कामही देत नाही. परिणामी, इच्छा नसतानाही तृतीयपंथीयांना भिक मागावे लागते. पण, सध्या लॉकडाउनमुळे बाजारपेठ ठप्प आहे. त्यामुळे तृतीयपंथीयांना कुणी भिकही देत नसल्याचे चित्र आहे. (Citizens in transgender communities face difficulties due to lockdowns)

डॉ. अर्चना पठारे यांनी फुलवले हास्य

अनेक तृतीयपंथीयांकडे आधारकार्ड, रेशनकार्ड नाही. त्यामुळे त्यांना स्वस्त धान्य दुकानातून रेशनही मिळत नसल्याने त्यांच्यावर उपासमारीची वेळ आली आहे. यासंदर्भातील त्यांची अडचण ओझरचे सामाजिक कार्यकर्ते भावेश मंडलिक यांनी निफाडच्या प्रांताधिकारी डॉ. अर्चना पठारे यांना फोन करून त्यांच्या घरातील धान्य संपले असून काही मदत होऊ शकते का? अशी विचारणा केली. त्या वेळी अधिकाऱ्यातील माणूस जागा झाला. आपण अधिकारी असून प्रशासनाच्या पद्धतीने आम्ही काय करू शकतो, असे उत्तर न देता अवघ्या काही तासांत किराणा व धान्य पाठवून दिले. त्यामुळे अशा कुटुंबाला दिलासा मिळाला आहे. या कार्यामुळे अधिकाऱ्यांप्रति नागरिकांचा मोठा विश्वास निर्माण होत आहे.

ओझरसह राज्यातील तृतियपंथीयांना शिधापत्रिका दिली तर किमान जेवणाची तरी सोय होईल. सततचे लॉकडाउन पाहता शाश्वत मदत हवी आहे. शासनाने आधार नोंदणी आणि अंत्योदय शिधापत्रिका द्यावी. त्यामुळे स्वस्त धान्य दुकानातून तृतिपंथीयांना धान्य मिळेल.

- भावेश मंडलिक, सामाजिक कार्यकर्ते, ओझर

आम्हीही माणूस आहोत. आम्हालाही भाव-भावना आहेत. भिक मागून जगणे आम्हालाही आवडत नाही. डॉ. अर्चना पठारे यांनी अडचणीत केलेली मदत न विसरता येणारी आहे.

- हेमा जाधव, तृतीयपंथी, ओझर

संबंधित तृतीयपंथीयांची माहिती घेऊन लवकरच रेशनकार्डसह शासनाची असलेली योजना राबविण्यात येईल.

- डॉ अर्चना पठारे, प्रांताधिकारी, निफाड

(Citizens in transgender communities face difficulties due to lockdowns)