Nashik Typing Exam: नाशिक जिल्हा परिषदेतर्फे शहर व जिल्ह्यात टायपिंगची परीक्षा घेण्यात येत आहे. नेहमी बी.डी. भालेकर व अन्य मध्यवर्ती केंद्रावर, सोयीच्या ठिकाणी होणारी या परिक्षेसाठी यंदा जिल्हा परिषद शिक्षण विभागाने बॉईज टाऊन शाळेत केंद्र दिल्याने विद्यार्थी व पालकांचा मोठा गोंधळ उडाला.

८ डिसेंबर २०२३ पासून बॉईज टाऊन येथे जिल्हा परिषदेतर्फे टंकलेखन, लघुलेखन व संगणक टायपिंगची परीक्षा घेण्यात येत आहे. (Confusion at Typing Exam Centre in nashik news)

ही परीक्षा केंद्र हे मध्यवर्ती बसस्थानकापासून खूपच दूरवर आहे. त्यामुळे परीक्षा केंद्र सापडण्यासाठी विद्यार्थ्यांना मोठी कसरत करावी लागली. परीक्षा देणारे विद्यार्थी केवळ शहरातीलच नव्हे तर जिल्हाभरातील आहेत.

काही खेड्यापाड्यातील आहेत. त्यामुळे शाळेच्या पत्त्यावर विद्यार्थी वेळेवर न पोचल्यामुळे बऱ्याच जणांची फजिती झाली. त्याचबरोबर संस्थाचालकांना टाईपरायटर घेऊन जाण्यास परवानगी न दिल्यामुळे ती देखील एक मोठी फजिती झाली.

एवढेच नव्हे तर या शाळेमध्ये संस्थाचालक, पालक व विद्यार्थ्यांसोबत आलेल्या कुणालाही आतमध्ये जाण्यास मज्जाव करण्यात आला. जिल्हा परिषद शिक्षण विभाग व सदर शाळा प्रशासनासंदर्भात पालकांनी संताप व्यक्त केला आहे.

हे केंद्र बदलून मिळावे अशी मागणी देखील करण्यात आली. यासंदर्भात नाशिक जिल्हा परिषदेचे शिक्षणाधिकारी प्रवीण पाटील यांच्याशी संपर्क साधला असता त्यांनी भ्रमणध्वनी उचलला नाही.

टंकलेखन, लघुलेखन, संगणक टायपिंग परीक्षेसाठी संस्था चालकांना टाईपरायटर मशिन ठेवायला सुद्धा आत जाऊ दिले नाही. संस्थेच्या मशिनवर विद्यार्थी सहा महिने सराव करतो आणि परीक्षेत त्याला त्या मशिनवर बसू दिले गेले नाही. वणी, दिंडोरी, सिन्नर, निफाड, दोडी बु., कळवण, सटाणा येथून लांबून विद्यार्थी सीबीएसला आले. तेथून केंद्र सापडत नसल्याने १०० ते १५० रुपये रिक्षावाल्याला द्यावे लागले.

सीबीएस जवळ शाळा कॉलेज असून लांब केंद्र का दिले? लघुलेखन परीक्षेवेळी रेकाॅर्डींग आवाज नीट ऐकू न आल्याने नापास होणार अशी भीती विद्यार्थी व्यक्त करत होते. विद्यार्थी, परीक्षा कडक वातावरणात घेतल्या तरी चालतील पण केंद्र, केंद्र संचालक यांची सहकार्य करण्याची भूमिका असावी असे मत सर्वांनी व्यक्त केले.