Nashik News : जिल्हा आरोग्य अधिकाऱ्यांच्या अधिनस्त असलेल्या कंत्राटी वैद्यकीय अधिकाऱ्यांचे चार महिन्यांपासून वेतन थकले आहे. चार महिन्यांचे वेतन थकल्याने कंत्राटी वैद्यकीय अधिकाऱ्यांमध्ये नाराजी पसरली आहे.

यातच, कंत्राटी वैद्यकीय अधिकाऱ्यांना अनुभव प्रमाणपत्रासाठी जिल्हा परिषदेत खेटा घालाव्या लागत असल्याने प्राथमिक आरोग्य केंद्रातील रुग्णांची तपासणी करायची की, वेतन मिळविण्यासाठी भांडायचे असा प्रश्न त्यांच्याकडून उपस्थित होत आहे. (Contractual Medical Officer salary arrears since 4 months nashik news)

जिल्हा परिषदेतील आरोग्य कर्मचाऱ्यांचे वेतन वेळात होत नाही हा प्रश्न जुना आहे. वारंवार या प्रश्नांवर चर्चा होते. परंतु, अद्यापही यावर तोडगा निघालेला नाही. कंत्राटी कर्मचाऱ्यांना शासनाच्या आरोग्य विभागाच्या शासन निर्णयानुसार पात्रतेनुसार वेतन निश्चिती आहे. यामध्ये एमबीबीएसच्या कंत्राटी वैद्यकीय अधिकाऱ्यांना ७० हजार रुपये तर बीएएमएसच्या कंत्राटी वैद्यकीय अधिकाऱ्यांना ४० हजार रुपये इतके वेतन आहे.

हे वेतन राज्य शासनाकडून जिल्हा परिषदेकडे येते आणि तेथून शासकीय कोशागारातून यांना मिळत असते. आरोग्य विभागाच्या अधिनस्त जिल्हाभरात एकूण २९३ वैद्यकीय अधिकाऱ्यांची पदे मंजूर आहेत. त्यामध्ये सध्या २५४ वैद्यकीय अधिकारी कार्यरत असून ३९ जागा रिक्त आहेत.

२५४ वैद्यकीय अधिकाऱ्यांपैकी १९८ हे कायमस्वरूपी आहेत तर ५६ वैद्यकीय अधिकारी कंत्राटी आहेत. या कंत्राटी वैद्यकीय अधिकाऱ्यांना ऑक्टोबरपासून वेतन मिळालेले नसल्याने हे वैद्यकीय अधिकारी आंदोलन करण्याच्या पावित्र्यात आहे. त्यामुळे आरोग्य विभागाने तत्काळ वेतन अदा करावे अशी मागणी त्यांच्याकडून होत आहे.

''वैद्यकीय अधिकाऱ्यांचे वेतनाबाबत राज्य शासनाकडे आपण पाठपुरावा करत सुरू आहे. वेतनाचा काही निधी प्राप्त झालेला आहे. येत्या दोन दिवसात यातून वेतन दिले जाईल.''- डॉ. सुधाकर मोरे, जिल्हा आरोग्य अधिकारी, जिल्हा परिषद