नाशिक : (जुने नाशिक) मुस्लिम समाजात महत्त्व असलेल्या हज आणि उमराह यात्रेवर कोरोनाचे सावट आहे. हज यात्रेस तीन ते चार महिन्यांचा अवधी असल्याने निश्‍चित कुठलेही आदेश प्राप्त नाही. तर काही दिवसांत सुरू होणाऱ्या रमजान महिन्याच्या उमराह यात्रेस मात्र स्थगिती देण्यात आल्याची माहिती मिळत आहे. 

भाविकांना यंदाच्या पर्वातील यात्रेस मुकावे लागणार

शुक्रवारी (ता. 24) चंद्रदर्शन झाल्यास शनिवार (ता. 25) पासून रमजान पर्वास (महिन्यास) सुरवात होणार आहे. 25 मेस रमजान ईद होणार आहे. पर्वाच्या दरम्यान शहरासह देशभरातील अनेक मुस्लिमबांधव उमराह यात्रा करत असतात. पर्वातील उपवास (रोजे) मक्का-मदिना येथे केल्यास अधिक पुण्य मिळते, अशी अनेकांची भावना आहे. त्यामुळे हज यात्रेप्रमाणेच रमजान महिन्यातील उमराह यात्रेस मक्का-मदिना येथे जगभरातील मुस्लिम भाविक येत असतात. यंदा कोरोनाचे सावट असल्याने सौदी सरकारकडून यात्रा स्थगित केली आहे. दोन महिन्यांपूर्वीच उमराह यात्रा स्थगित करण्यात आली होती. परंतु रमजान पर्वात तरी यात्रा होणार, अशी आशा मुस्लिम भाविक व्यक्त करत होते. कोरोनाचे सावट वाढल्याने यात्रा स्थगित करण्यात आली. इच्छा असणाऱ्या भाविकांना यंदाच्या पर्वातील यात्रेस मुकावे लागणार आहे. 

हेही वाचा > CoronaFighters : "आधी लढा कोरोनाशी नंतरच लगिन!''...असा निर्धार 'त्यांचा' पक्का

भाविकांमधील धाकधूक वाढली 

यंदाच्या हज यात्रेवर प्रश्‍नचिन्ह कायम आहे. हज यात्रेस तीन ते चार महिन्यांचा अवकाश असला तरी कोरोनाचे सावट अद्याप संपलेले नाही. पुढील काही महिन्यांत त्याचा प्रादुर्भाव कमी होईल अशीही स्थिती नाही. त्यामुळे भाविकांमधील धाकधूक वाढली आहे. या महिन्यात सौदीमधील परिस्थिती सामान्य झाल्यास हज यात्रा सुरू होण्याची शक्‍यता आहे.  

हेही वाचा > photos : 'सरकार मायबाप या संकटातून बाहेर काढा!'...शेतक-यांची आर्त हाक