सटाणा (जि. नाशिक) : शहरात घरफोड्यांचे सत्र पुन्हा एकदा सुरू झाले आहे. मालेगाव रस्त्यावरील मंगेश सोनवणे यांच्या राहत्या घराचे कुलूप तोडून चोरट्यांनी रोख रक्कम व सोन्याचे दागिने असा दोन लाख ४० हजार रुपयांचा ऐवज चोरून नेला. दिवसाढवळ्या झालेल्या या धाडसी घरफोडीमुळे सर्वत्र एकच खळबळ उडाली असून नागरिकांमध्ये भीतीचे वातावरण तयार झाले आहे. (Daylight house burglary in satana creates fear among citizens Nashik News)

सटाणा - मालेगाव रस्त्यावरील आनंद मिल शेजारी फोटोग्राफी व्यवसाय करणारे मंगेश सोनवणे हे वास्तव्यास आहेत. सोनवणे बुधवारी (ता.२८) कुटुंबासह बाहेर गेले होते. काम आटोपून सायंकाळी सहा वाजता आई, पत्नी व मुलीला घेऊन ते घरी गेले असता घराच्या दरवाज्याचे कुलूप तोडून दरवाजा उघडा असल्याचे त्यांना दिसून आले.

तसेच घरातील दोन लोखंडी कपाट तोडून त्यातील साठ हजार रुपयांची रोकड, सोन्याचे दागिणे असा सुमारे दोन लाख ४० हजार रुपयांचा ऐवज अज्ञात चोरट्यांनी पळवून नेल्याचे निदर्शनास आले. याप्रकरणी सटाणा पोलिसांनी गुन्हा दाखल केला आहे.

गेल्या दोन महिन्यांपूर्वी अज्ञात चोरट्यांनी मालेगाव रस्त्यावरील पर्बत नगरमध्ये मध्यरात्री एकाच वेळी दोन ठिकाणी धाडसी घरफोड्या तर एका घरात चोरीचा प्रयत्न केला होता. या चोऱ्यांचा शोध लावण्यात पोलिसांना अद्यापही यश आलेले नाही. त्यातच पुन्हा शहरात धाडसी घरफोडी झाल्याने नागरिकांमध्ये भीतीचे वातावरण पसरले आहे.