सिडको (नाशिक) : राजकारणात जेव्हा प्रवेश झाला त्यावेळी त्यांच्या एका राजकीय सहकार्याने त्यांचे शिक्षण विचारले. बारावी नापास असे सांगताच त्या सहकार्याने त्यांची चार चौघात ‘खिल्ली’ उडविली. त्यावेळी मनसे जिल्हाध्यक्ष दिलीप दातीर यांना अपमानित झाल्यासारखे वाटले. मग त्यांनी ठरवले की एक दिवस पदवी पूर्ण करणारच आणि ती शपथ त्यांनी पूर्ण करून दाखविली.(degree-obtained-by-MNS-district-president-nashik-marathi-news)

जिद्द, चिकाटीच्या जोरावर मनसे जिल्हाध्यक्षांनी केली पदवी संपादन

महाराष्ट्र नवनिर्माण सेनेचे नाशिक जिल्हाध्यक्ष दिलीप दातीर यांनी राज्यशास्त्र या विषयात पदवी संपादन करत स्वप्न पूर्ण केल्याने त्यांच्यावर अभिनंदनाचा वर्षाव होताना दिसत आहे. दिलीप दातीर यांनी राजकीय कारकीर्द सुरु ठेवत असताना जिद्द व मेहनतीने पदवीपर्यंतचे शिक्षणदेखील पूर्ण केले आहे. बुधवारी (ता.९) त्यांना पदवी संपादन केल्याची आनंदाची बातमी मिळाली आणि त्यांच्या चेहऱ्यावर हसू फुलले. त्यांनी केवळ पदवी पास केली नसून फस्ट क्लास विथ डस्टिंक्शन मिळविले आहे. ही बाब विशेष म्हणावी लागेल.

शपथ पूर्ण

दिलीप दातीर यांचा राजकारणात प्रवेश झाला त्यावेळी त्यांच्या एका राजकीय सहकार्याने त्यांचे शिक्षण विचारले. बारावी नापास असे सांगताच त्या सहकार्याने त्यांची चार चौघात ‘खिल्ली’ उडविली. त्यावेळी श्री. दातीर यांना अपमानित झाल्यासारखे वाटले. मग त्यांनी ठरवले की एक दिवस पदवी पूर्ण करणारच आणि ती शपथ त्यांनी पूर्ण करून दाखविली. ज्यांनी माझी खिल्ली उडवली आज ते मला गुरूसमान आहे, असे ते उदार मनाने सांगताना दिसतात. ही बाब विशेष म्हणावे लागेल.

यापुढे शिक्षण सुरूच ठेवणार

घरामध्ये सात बहिणीच्या पाठीवर एकुलता एक असल्याने व्यवसायाची जबाबदारी सोपवण्यात आली. त्यामुळे बारावीनंतरचे शिक्षण अपूर्ण राहीले. राजकारणात प्रवेश केल्यानंतर पदवी पूर्ण करण्याचे ठरविले. जोमाने व चिकाटीने अभ्यास केला व यशस्वी झालो. यापुढे शिक्षण सुरूच ठेवणार आहे. - दिलीप दातीर, जिल्हाध्यक्ष, मनसे.