नाशिक : दहावीचा निकाल जाहीर होऊन महिन्‍याभरापेक्षा अधिक कालावधी झालेला असताना अद्यापपर्यंत अकरावी प्रवेशाची (11th admission) प्रक्रिया सुरु झालेली नाही.

प्रवेशात होत असलेल्‍या विलंबामुळे अभ्यासक्रम (Syllabus) प्रभावित होण्याची भीती व्‍यक्‍त होत आहे. जेईई, नीट सारख्या राष्ट्रीय प्रवेश परीक्षांची तयारी करणाऱ्या विद्यार्थ्यांच्‍या पोटात गोळा येत असून पालकांचीही चिंता वाढली आहे. (Delay in admission tensed students nashik latest Marathi news)

विविध राष्ट्रीय व राज्‍यस्‍तरीय प्रवेश परीक्षांकरीता अकरावी व बारावीच्‍या संयुक्‍त अभ्यासक्रमावर प्रश्‍न विचारले जात असतात. त्‍यामुळे बारावीप्रमाणे अकरावीचा अभ्यासक्रमही महत्त्वाचा असतो. इयत्ता दहावीचा निकाल १७ जूनला जाहीर झाला होता.

महिनाभर उलटूनही अकरावीचे प्रवेश अद्यापपर्यंत झालेले नाही. विशेषतः विज्ञान शाखेत प्रवेशास इच्‍छुक विद्यार्थ्यांची चिंता यामुळे वाढलेली आहे. विलंब झाल्‍याने अभ्यासक्रम अध्ययनात घाई-गडबड होण्याची भीती व्‍यक्‍त होत आहे.

आणखी सुमारे एक महिन्‍याचा कालावधी प्रवेशाची प्रक्रिया पूर्ण होण्यासाठी जाणार असल्‍याने ऑगस्‍ट अखेरीस अध्ययन प्रक्रिया सुरु होण्याचा अंदाज आहे. यामुळे शैक्षणिक नियोजित कोलमडण्याचीही शक्‍यता वर्तविली जात आहे.

दरम्‍यान प्रवेश निश्‍चितीची प्रतीक्षा न करता अनेक विद्यार्थ्यांनी खासगी शिकवणी लावत अभ्यासाला सुरवात केलेली आहे. अनेक शिकवणी चालकांकडून अध्ययन प्रक्रिया सुरु केलेली आहे.

ग्रामीण विद्यार्थ्यांची आघाडी

दहावीचा निकाल जाहीर झाल्‍यानंतर नाशिक महापालिका क्षेत्रातच केंद्रीभूत ऑनलाइन पद्धतीने प्रवेश प्रक्रिया राबविली जाणार आहे. दुसरीकडे ग्रामीण भागात प्रवेश निश्‍चित झालेले असल्‍याने या विद्यार्थ्यांनी अभ्यासात आघाडी घेतली आहे.