सिडको (नाशिक) : एरवी नागरिकांच्या विविध मागण्या, समस्या व विकासकामांसाठी रास्ता रोको करण्यात येत असल्याचे चित्र आपण नेहमीच बघत आलो आहोत; परंतु आता महापालिका निवडणूक जवळ येऊन ठेपल्याने लोकप्रतिनिधींच्या पुढाकाराने सुरू असलेल्या विकासकामांमुळे सिडको परिसरात विकासकामांनीच रास्ता रोको केल्याचे सकारात्मक चित्र बघायला मिळत आहे. 

सिडको परिसरात विद्यमान नगरसेवकांनी विविध नागरी विकासकामांचा धूमधडाका सुरू केल्याने सिडकोतील मुख्य रस्त्यावर ‘सावधान, पुढे काम सुरू आहे’ अशा आशयाचे फलक सध्या ठिकठिकाणी झळकत आहेत. यामुळे महापालिका निवडणूक जवळ आली की म्हणून की काय ही विकासकामे सुरू आहेत, अशी विचारणा सध्या मतदारराजा यानिमित्ताने करू लागल्याचे दिसते आहे. 

हेही वाचा> दिव्यांग पित्याचे मुलाला अभियंता बनविण्याचे डोळस स्वप्न; कॅलेन्डर विक्रीतून जमवताय पै पै, असाही संघर्ष

अवघ्या दीड वर्षाच्या अंतरावर नाशिक महापालिका निवडणूक जवळ येऊन ठेपली आहे. त्यामुळे आजी-माजी व नवीन उमेदवार हे नगरसेवकपदाच्या निवडणुकीसाठी सज्ज झाल्याचे दिसून येत आहे. याकरिता विविध उपक्रमांच्या माध्यमातून ते सध्या जनतेपर्यंत पोचण्याचा प्रयत्न करत आहेत. थोडक्यात काय तर उमेदवारांच्या या निवडणूक फंड्यामुळे मतदारराजाला महापालिका निवडणूक जवळ येऊन ठेपल्याची चाहूल यानिमित्ताने लागल्याचे चित्र बघायला मिळत आहे. 

हेही वाचा> गॅस गिझर भडक्यात बाथरूममध्ये तरुणाचा गुदमरून मृत्यू; नववर्षाच्या पहिल्याच दिवशी पाटील कुटुंबात आक्रोश

सुरू असलेले उपक्रम 

कॅलेंडर वाटप, हळदी-कुंकू, गेट-टुगेदर, रक्तदान शिबिर, विविध स्पर्धा, बक्षीसवाटप, मतदार नोंदणी, विविध क्रीडा स्पर्धा, साई भंडारा, तीर्थयात्रा, सहल, तसेच सार्वजनिक छोटे-मोठे उद्‌घाटन-भूमिपूजन कार्यक्रम आदी. उत्तमनगर, पवननगर, शिवाजी चौक, त्रिमूर्ती चौक, उपेंद्रनगर, अंबड, चुंचाळे, खुटवडनगर आदी परिसरामध्ये उड्डाणपूल, सेंट्रल पार्क, रस्ते, लाइट, पाण्याची पाइपलाइन, ड्रेनेज आदी विकासकामे सुरू आहेत..