नाशिक : वेळ सायंकाळची…स्थळ, नाशिकमधील पोलिस कवायत मैदानासमोरील स्नेहबंधन पार्क. राज्याचे पोलिस महासंचालक संजय पांडे (DGP Sanjay Pandey) यांनी शहर पोलिस दलातील शिपाई गौरव आणि प्रियंका देशमुख या दामप्त्याच्या निवासस्थानी भेट दिली. काळजी घ्या! आनंदात रहा! अशा शब्दांमध्ये पांडे यांनी दोघांना शुभेच्छा दिल्या. वडीलकीच्या नात्याने साहेबांनी दाखवलेला जिव्हाळा शब्दांमध्ये वर्णन करण्यासारखा नाही, अशा भावना गौरव यांनी व्यक्त केल्यात.

गौरव हे मूळचे सिन्नरचे. ते २०१७ मध्ये पोलिस दलात दाखल झाले. पत्नी प्रियंका या २०१३ मध्ये पोलिस झाल्या. गौरव हे नाशिक पोलिस आयुक्तालयाच्या सेवेत आहेत. प्रियंका यांची बदली ठाणे ग्रामीण मधून नाशिक शहरमध्ये झाली. पण पत्नीला नाशिकला येता येत नव्हते. त्यामुळे गौरव यांनी पती-पत्नी एकत्रीकरणासाठी मदत व्हावी अशी विनंती पांडे यांची भेट घेऊन केली होती. त्यानंतर प्रियंका यांची बदली नाशिकमध्ये झाली. मग गौरव यांनी पांडे यांना नाशिकला आलात, की घरी या, अशी विनंती केली होती. पांडे हे नाशिकच्या दौऱ्यावर असताना गौरव यांनी त्यांना संसाराला भेट द्यावी असा मेसेज पाठवला. कार्यालयीन कामकाजामुळे पांडे यांच्याकडून होकार मिळाला नाही…

अन् साहेब घरी पोचले..

मेसेज केल्याच्या दिवशी सायंकाळी ‘गौरव कुठं आहेस?‘ असा विचारणा करणारा फोन केला आणि घरी येतोय असा निरोप साहेबांनी दिला. फोन सुरु असताना पाहतो काय? साहेब घरी पोचले, असे सांगून गौरव म्हणाले, की घरात येताना रांगोळीच्या पलिकडच्या बाजूला साहेबांनी बूट काढले. घरात आल्यावर साध्या सोफ्यावर साहेब बसले. छान राहता, चांगलं झालं, चांगला संसार फुलला अशी कौतुकाची थाप साहेबांनी आम्हा दोघांना दिली. पाणी, दूध घेतले. आमच्या दोघांसमवेत साहेबांनी आनंदाने छायाचित्र, सेल्फी घेण्यास परवानगी दिली. एकुणच साहेबांची भेट म्हणजे, आम्हा दोघांसाठी दसरा-दिवाळी सणासारखी राहिली.