जुने नाशिक : रविवारच्या सुट्टीचे औचित्य साधत दिवाळीच्या खरेदीसाठी बाजारात गर्दी उसळली होती. कपड्यांच्या दुकानावर सर्वाधिक गर्दी बघावयास मिळाली.

अवघ्या आठ दिवसांवर दिवाळी येऊन ठेपली आहे. शाळेंना सुट्ट्या लागल्या आहेत. त्यात दिवाळीपूर्वीचा शेवटचा रविवार आल्याने सुट्टीचे औचित्य साधत नागरिकांनी बाजारपेठेत नवीन कपड्यांसह विविध वस्तु खरेदीसाठी बाजारात मोठी गर्दी झाली होती. जणू जनसागर उलटल्याचे चित्र मेन रोड, शालिमार बाजारपेठेत दिसून आले. दुकानदारांनी सकाळी लवकरच दुकाने उघडल्या होत्या. विशेष करून रेडिमेड कपडे, लहान मुलांच्या कपड्यांच्या दुकानात अधिक गर्दी दिसली. (Diwali Festival 2022 Crowd in city for Diwali shopping Nashik Latest Marathi News)

यामुळे विविध व्यवसायिकांनी समाधान व्यक्त केले. दोन वर्ष कोरोना प्रादुर्भावामुळे अतिशय साध्या पद्धतीने दिवाळी साजरी झाली. त्यामुळे व्यावसायिकांचे मोठे नुकसान झाले होते. यंदा निर्बंधमुक्त दिवाळी उत्साहात साजरी होईल, अशी आशा व्यवसायिकांना आहे. त्यास साजेशे चित्र बाजारात दिसून आले.

मेन रोड, शालिमार, दहिपूल परिसरात कपडे, पादत्राणे, इलेक्ट्रॉनिक्स, इलेक्ट्रिक वस्तू खरेदीसाठी, तर कानडे मारुती लेनमध्ये घराची सजावटीसाठी वस्तू खरेदीसाठी गर्दी झाली होती. गर्दीतून दुचाकी, तीनचाकी वाहने मार्गक्रम करीत असल्याने नागरिकांना अडचणींना सामोरे जावे लागले. दोन वर्षांनंतर यंदाची दिवाळी उत्साहात साजरी करण्यास मिळत आहे, हा आनंद त्यांना समस्यांकडे दुर्लक्ष करण्यास भाग पाडत होता.