Dr. Ambedkar Jayanti : भारतरत्न डॉ. बाबासाहेब आंबेडकर यांची जयंती शुक्रवारी (ता. १४) शहरभर उत्साहात साजरी करण्यात येणार आहे. यानिमित्ताने मुख्य मिरवणुकीसह नाशिक रोड येथे मिरवणूक तर, पाथर्डी फाटा येथे कार्यक्रमाचे नियोजन आहे.

या जयंती उत्सवात कोणताही अनुचित प्रकार वा गालबोट लागू नये, यासाठी शहर पोलिस अलर्ट आहेत. खबरदारी म्हणून जयंती मिरवणुकीवर ड्रोन कॅमेऱ्याच्या माध्यमातून नजर ठेवली जाणार आहे.

तसेच, मिरवणूक मार्गावर सीसीटीव्ही कॅमेऱ्यांद्वारे पोलिसांची नजर असणार आहे. कडेकोट पोलिस बंदोबस्ताचे नियोजन करण्यात आलेले आहे. (Dr Ambedkar Jayanti Drone surveillance on procession Strict police presence nashik news)

जुने नाशिकमधील राजवाडा येथून मुख्य मिरवणूक दरवर्षी निघते. यासाठी पोलिस आयुक्त अंकुश शिंदे यांच्या आदेशान्वये कडेकोट बंदोबस्ताचे नियोजन केले आहे. मुख्य मिरवणूक मार्गावर पोलिसांच्या सीसीटीव्ही कॅमेऱ्याची नजर असणार आहे.

तसेच, मिरवणुकीवर यंदा ड्रोन कॅमेऱ्याचीही करडी नजर ठेवली जाणार असल्याची माहिती परिमंडळ एकचे उपायुक्त किरणकुमार चव्हाण यांनी दिली. जुने नाशिक, नाशिक रोड व पाथर्डी येथे साजरी होणाऱ्या जयंतीसाठी तब्बल अडीच हजार पोलिसांचा बंदोबस्त तैनात करण्यात येणार आहे.

यासह स्थानिक पोलिस ठाणे, गुन्हे शाखा, विशेष गोपनीय शाखेसह राज्य राखीव पोलिस बलाच्या दोन तुकड्या, दंगल नियंत्रण पथक (आरसीपी), क्यूआरटी असे सर्व पथके तैनात राहणार आहेत. परिमंडळ एकचे पोलिस उपायुक्त किरणकुमार चव्हाण, परिमंडळ दोनचे उपायुक्त चंद्रकांत खांडवी यांनी बंदोबस्ताचे आदेश दिले आहेत.

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

असे असेल बंदोबस्त

पोलिस आयुक्त : १
उपायुक्त : ३
सहायक आयुक्त : ८
पोलिस निरीक्षक : ३० पेक्षा अधिक
पोलिस अधिकारी : ३०० पेक्षा अधिक
होमगार्ड : ३००
अंमलदार : दोन हजार

"डॉ. बाबासाहेब आंबेडकर जयंतीनिमित्त आयुक्तालय हद्दीमध्ये कडेकोट पोलिस बंदोबस्त तैनात असेल. कोणताही अनुचित प्रकार घडू नये यासाठी पोलिसांची सीसीटीव्हीद्वारे नजर असेल. जादा कुमकही सज्ज असेल.'- प्रशांत बच्छाव, पोलिस उपायुक्त, गुन्हेशाखा.