नाशिक : सततच्‍या पावसानंतर दोन-तीन दिवसांपासून पावसाने उघडीप दिली आहे. तप्त उन्‍हामुळे एकीकडे घामाघूम होत असताना, दुसरीकडे रस्‍त्‍यावरील धुळीने नाशिककर बेजार झाले आहेत.

धुळीमुळे दुचाकीचालकांना कसरत करावी लागत आहे. धूलिकणांमुळे नेत्रविकारांमध्ये वाढ होण्याची भीतीही व्‍यक्‍त होत आहे. (Dusty Nashik Fear of increase in eye diseases nashik Latest Marathi News)

जुलैमध्ये सलग तीन आठवडे जोरदार पाऊस झाला. महिना संपत असताना, पावसाने उघडीप दिली असून, पावसाच्‍या काळात झालेल्‍या चिखलाचे रूपांतर आता धूलिकणांमध्ये झाले आहे. शहरासह उपनगरीय भागांमध्ये बहुतांश रस्‍त्‍यांवर धुळीचे साम्राज्‍य बघायला मिळत आहे.

वाहन, कपड्यांसह डोळ्यातही धूलिकण जात असल्‍याने नेत्रविकारांचे प्रमाण वाढण्याची भीती निर्माण झाली आहे. धुळीमुळे डोळे लाल होणे, डोळ्यांमध्ये खाज सुटणे, शिरांना इजा होण्यासारख्या गंभीर प्रकारांमध्ये वाढ झाली आहे.

दुसरीकडे आकाश मोकळे राहत असल्‍याने तप्त उन्‍हाच्‍या झळांचा सामना श्रावण महिन्‍यात नाशिककरांना करावा लागत आहे. त्‍यामुळे काही दिवसांपूर्वी पावसाने वैतागलेले नाशिककर आता उन्‍हाच्‍या झळा आणि रस्‍त्‍यावरील धुळीने बेजार झाल्‍याचे बघायला मिळत आहे.

किमान तापमान २२ अंशांवर

पाऊस सुरू असताना, तापमानातही घसरण होऊन सायंकाळी हवेत गारवा जाणवत होता. रविवारी (ता. ३१) नाशिकचे किमान तापमान २२ अंश सेल्सिअस नोंदविले गेले. शनिवारी (ता. ३०) किमान तापमान २२.४ अंश सेल्सिअस होते, तर कमाल तापमान ३०.२ अंश सेल्सिअस नोंदविले गेले.