नाशिक : (नाशिक रोड) लॉकडाउनमुळे राज्यातील सर्वच उद्योग व व्यवसाय बंद आहेत. त्यामुळे वीजबिलात स्थिर व मागणी आकार पुढील तीन महिन्यांसाठी स्थगित करण्यात आला असून, त्यानंतर येणाऱ्या बिलात कोणताही दंड न आकारता तो समाविष्ट करण्यात येणार आहे, अशी माहिती राज्याचे ऊर्जामंत्री डॉ. नितीन राऊत यांनी दिली. 

वास्तविक मीटर रीडिंगनुसार वीजबिल

लॉकडाउनच्या कालावधीतील वीजबिलातील स्थिर व मागणी आकार माफ करावा, अशी मागणी औद्योगिक, तसेच वाणिज्य ग्राहकांनी केली होती. ही मागणी ऊर्जामंत्री डॉ. राऊत यांनी मान्य केली आहे. "एएमआर'तर्फे मीटर रीडिंग उपलब्ध असल्यास त्या ग्राहकांना त्यांच्या मीटरवरील नोंदीनुसार वास्तविक बिल देण्यात येईल. मीटर रीडिंग उपलब्ध नसल्यास त्या ग्राहकांना सरासरी वीजबिल देण्यात येईल. मेमध्ये एएमआरमार्फत वास्तविक मीटर रीडिंगनुसार वीजबिल आकारण्यात येईल. 

हेही वाचा > इटलीचे दाम्पत्य नाशिकमध्ये आढळतात तेव्हा.. अन् ते सुद्धा विदाऊट मास्क?

एप्रिलचे वीजबिल भरण्यासाठी 31 मे अंतिम मुदत

लॉकडाउनच्या कालावधीतील शून्य वापराचे वीजबिल देण्यात येणार आहे. तत्काळ वीजबिल भरणा, गो-ग्रीन सवलत, डिजिटल पेमेंटच्या सवलती ग्राहकांना नियमाप्रमाणे लागू असून, मार्च महिन्याचे बिल भरण्यास 15 मेपर्यंत सवलत दिली आहे. एप्रिलचे वीजबिल भरण्यासाठी 31 मे अंतिम मुदत आहे. ग्राहकांनी वीजबिल वेळेवर भरून महावितरणला सहकार्य करावे, असे आवाहनही ऊर्जामंत्री डॉ. राऊत यांनी केले आहे.  

हेही वाचा > जिल्ह्यातील पहिला कोरोनामुक्त रुग्ण म्हणतोय...'परमेश्‍वररूपी डॉक्‍टरांमुळेच कोरोनाच्या विषाणूवर मात'