नाशिक : गुजरातच्या दिशेने नाशिक शहरात आल्यानंतर महाराष्ट्राच्या अस्मितेचे प्रतीक नजरेस पडावे, या हेतूने पंचवटी कारंजावर छत्रपती शिवाजी महाराजांचा अश्वारूढ पुतळा बसविला जाणार आहे. त्यासाठी महापालिकेने विविध संस्थांकडून देकार मागविले असून, अंदाजित एक कोटी ३६ लाख रुपयांचा खर्च अपेक्षित धरला आहे. ब्रॉन्झ धातूचा पुतळा कारंजावर बसविला जाणार आहे.

पंचवटी कारंजा येथून गुजरात, राजस्थानकडे जाणारा मार्ग आहे. या मार्गावरून हजारो गुजरातमधील लोक रामकुंडावर स्नानासाठी तसेच उद्योग, व्यवसायानिमित्त येतात. गुजरातकडून आल्यानंतर महाराष्ट्राच्या अस्मितेचे प्रतीक नजरेस पडावे, या हेतूने पूर्णाकृती पुतळा बसविण्याचे नियोजन अनेक वर्षांपासून आहे. पंचवटीतील नागरिकांनीदेखील अनेकदा निवेदने देवून पूर्णाकृती पुतळा बसविण्याची मागणी केली होती. यापूर्वी कांरजावर अर्धाकृती पुतळा होता. त्यानंतर पूर्णाकृती पुतळा बसविण्यात आला, मात्र पुतळ्याची उंची कमी आहे. सन २०१८ पासून अश्वारूढ पुतळा बसविण्याची मागणी होती. आमदार ॲड. राहुल ढिकले यांच्यासह माजी उपमहापौर गुरमित बग्गा, काँग्रेसचे पदाधिकारी नरेश पाटील, मनसेचे खंडू बोडके आदींनी पुतळ्यासाठी पाठपुरावा केला.

काही दिवसांपूर्वी पंचवटीतील स्थानिक कार्यकर्त्यांसह पदाधिकाऱ्यांनी पुतळ्यासाठी आयुक्त कैलास जाधव यांची भेट घेतली होती. त्यानुसार ब्रॉन्झ धातूच्या पुतळ्यासाठी निविदा जाहीर करण्यात आली. एक कोटी ३६ लाख रुपये खर्च होणार आहे. साधारण सहा महिन्यात पुतळा बसविण्याचे काम पूर्ण होईल, अशी अपेक्षा आहे.

स्थानिक नागरिकांची अनेक वर्षांपासूनची पूर्णाकृती पुतळ्याची मागणी होती. त्यानुसार सर्वपक्षीयांच्या पुढाकारातून आम्ही पुतळ्यासाठी प्रयत्न केले.

- ॲड. राहुल ढिकले, आमदार.

गुजरातच्या दिशेने आल्यानंतर पंचवटी कारंजा हे प्रमुख प्रवेशद्वार लागते. तेथे छत्रपतींचा पूर्णाकृती पुतळा उभारावा अशी मागणी स्थानिक नागरिकांची होती. त्यानुसार प्रस्तावाला मंजुरी देण्यात आली.

- गुरमित बग्गा, स्थानिक नगरसेवक.