नाशिक / दिक्षी : 'हे तर लय बेस हाय'...लॉकडाउनमुळे शेतकऱ्यांना मोठ्या प्रमाणात आर्थिक नुकसानीचा फटका सहन करावा लागला हे तर जग जाहीर आहे, मात्र याच कोरोनाच्या महामारीत झेंडूची फुलं सोन्याची अंडी बनून उत्पादकाच्या मदतीला धावून आल्याने त्यांना वीस हजार रूपये रोज मिळत आहेत...ते कसे? चला जाणून घेऊयात... 

शेतीमध्ये विविध प्रयोग 

कोरोनामुळे देशभरात लॉकडाउनमुळे शेतकऱ्यांना मोठ्या प्रमाणात आर्थिक नुकसानीचा फटका सहन करावा लागला. मात्र निफाड तालुक्‍यातील दिक्षी येथील अजय चौधरी या युवा शेतकऱ्याने या संकटाला आव्हान देत पाच एकर झेंडूमध्ये खरबूज, टरबूज हे आंतरपीक घेतले आहे. लॉकडाउनच्या काळामध्येही त्यांनी तीन दिवसांत तीन हजार किलो झेंडूच्या फुलांची 20 रुपये किलोप्रमाणे विक्री केली आहे. म्हणजेच प्रतिदिन एक हजार किलो फुलांच्या माध्यमातून त्यांना 20 हजार रुपये रोज मिळत असल्याचे त्यांनी सांगितले. अजय चौधरी आणि ज्ञानेश्‍वर चौधरी हे दोघे भाऊ आपल्या मालकीच्या शेतीमध्ये विविध प्रयोग करून शेती करतात. सध्या त्यांच्याकडे डाळिंबाची बाग आहे.

लॉकडाउनमध्येही चांगला आधार

पाच एकर जमिनीवर त्यांनी झेंडूची लागवड केली आहे. झेंडूच्या फुलांनी त्यांना लॉकडाउनमध्येही चांगला आधार दिला. बहुपीक शेतीच गरजेची मुंबई येथे झेंडूच्या फुलांची विक्री करून आर्थिक उत्पन्न मिळवत आहेत. दोन आठवड्यांपूर्वी झालेल्या अवकाळी पावसामुळे फुलांचे काही प्रमाणात नुकसान झाले. मात्र चौधरी यांनी नैसर्गिक आपत्ती येणारच म्हणून बहुपीक पद्धतीचा वापर सुरू केला. 

हेही वाचा > एमएचटी-सीईटी परीक्षेच्या अर्जासाठी अंतिम मुदतवाढ; सीईटी सेलचा निर्णय

नैसर्गिक आपत्ती येणारच म्हणून...

एखादे पीक खराब झाले तर दुसरे पीक आधार देईल. प्रत्येक वेळी शासनाच्या तुटपुंज्या मदतीकडे डोळे लावून बसणे त्यांना आवडत नाही. त्यामुळे चौधरी यांनी पाच एकर फुलांच्या बागेत खरबुजाची 18 हजार, तर टरबुजांच्या तीन हजार रोपांची लागवड केली. फुलांमधून उत्पन्न सुरू असून, पुढे खरबूज आणि टरबूज काढणीला येणार आहेत. सध्या किरकोळ बाजारात 20 रुपये किलोप्रमाणे खरबूज आणि टरबुजांची विक्री होत आहे. यामुळे इतर शेतकऱ्यांनीही एकाच खर्चिक पिकामागे न लागता बहुपीक शेती करण्याचे आवाहन चौधरी यांनी केले आहे.

हेही वाचा > 'भूक कशी लॉकडाउन करणार?'...शेवटी 'त्यांनी' रिक्षाचे टायर विकून भागला घरखर्च!