YCMOU Admission : यशवंतराव चव्‍हाण महाराष्ट्र मुक्‍त विद्यापीठातर्फे शैक्षणिक वर्ष २०२३-२४ च्‍या प्रवेश प्रक्रियेला दुसऱ्यांदा मुदतवाढ दिली आहे. ऑनलाइन प्रवेशअर्ज विनाविलंब शुल्‍क भरण्याची मुदत ३१ ऑगस्‍टपर्यंत वाढविली आहे.

तर प्रवेश अर्जास विभागीय केंद्राच्‍या मान्‍यतेची मुदत ९ सप्‍टेंबरपर्यंत असणार आहे. (Extension of ycmou admission till 31st August nashik news)

राज्‍यभर विस्‍तार असलेल्‍या मुक्‍त विद्यापीठातर्फे सध्या विविध अभ्यासक्रमांच्‍या प्रवेशासाठी प्रक्रिया सुरू आहे. विद्यापीठ अधिकार मंडळाने घेतलेल्‍या निर्णयानुसार कृषी, शिक्षणक्रम, बी. एड., बी. एड. (विशेष) आदी शिक्षणक्रमांव्‍यतिरिक्‍त अन्‍य शिक्षणक्रमांच्‍या प्रवेशासाठी मुदतवाढ जाहीर केली आहे.

यापूर्वीच्‍या वेळापत्रकानुसार रविवारी (ता.२०)पर्यंत मुदत असताना आता येत्‍या ३१ ऑगस्‍टच्‍या रात्री ११ वाजून ५९ मिनिटांपर्यंत इच्‍छुक विद्यार्थ्यांना अर्ज करता येणार आहे.

हेही वाचा : Credit Card फसवणूक....काय घ्याल काळजी?

प्रवेश अर्जास विभागीय केंद्राच्‍या मान्‍यतेची मुदत ९ सप्‍टेंबरपर्यंत घेता येईल. विविध घटकांतील विद्यार्थ्यांना शिक्षणाच्‍या मुख्य प्रवाहात येण्याची यानिमित्त संधी उपलब्‍ध होणार आहे.

पदव्‍युत्तर अभ्यासक्रमांची रचना

कुलगुरू प्रा. डॉ. संजीव सोनवणे यांनी पदभार स्‍वीकारल्‍यापासून विविध रचनात्‍मक बदल घडविले जात आहेत. राष्ट्रीय शैक्षणिक धोरणाप्रमाणे पदव्‍युत्तर पदवी अभ्यासक्रमांच्‍या संरचनेत बदल करण्यात आला असून, विद्यार्थ्यांना सुधारित अभ्यासक्रम शिकविला जाणार आहे.