Nashik News : मडकीजांब येथे एकाने बनावट गावठाण प्रमाणपत्राचा दाखला तयार केल्याच्या संशयावरून दिंडोरी पोलिस ठाण्यात तक्रार दाखल झाली आहे. तालुक्यामध्ये पुन्हा एकदा बनावट दाखल्याचा प्रकार उघडकीस आल्याने खळबळ उडाली आहे. (Fake Gram Panchayat certificate used case filed against suspect Nashik Crime News)

मडकीजांब येथे ग्रामपंचायतीमध्ये एक गावठाण प्रमाणपत्राच्या दाखल्याची प्रत उपसरपंच अनिल वडजे यांना बघावयास मिळाली. त्या प्रमाणपत्रावर संशय आल्याने त्यांनी ग्रामसेवक समाधान शेवाळे यांना दाखल्याची खातरजमा करण्यास सांगितले.

शेवाळे यांनी त्याची शहानिशा केली असता मडकीजांब येथील भास्कर काशिनाथ जगताप यांना मिळकत घर नं. ७३४ वर गावठाण प्रमाणपत्र असे उल्लेख करून त्यावर मडकीजांब ग्रामपंचायतीचा गोल शिक्का व ग्रामसेवकाच्या सहीसह शिक्का मारलेला आढळून आला.

त्यावर केलेली सही ग्रामसेवक शेवाळे यांची नसल्याची खात्री शेवाळे यांना झाली. शेवाळे यांनी हा दाखला बनावट असल्याची माहिती उपसरपंच अनिल वडजे यांना दिली. त्यावरुन भास्कर जगताप यांना विचारपूस केली असता कर्ज प्रकरण, कागदपत्र बनवण्यासाठी सोमनाथ पगारे यांना पाच हजार रुपये दिल्याची माहिती मिळाली.

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

त्यावेळी हा दाखला सोमनाथ नाथा पगारे यांनी दिल्याची माहिती भास्कर जगताप यांनी दिली. यावरुन ग्रामसेवक शेवाळे यांनी गटविकास अधिकारी नम्रता जगताप यांना लेखी स्वरूपात कळविले असता संबंधितावर गुन्हा दाखल करण्याचा आदेश त्यांनी दिला.

त्यानुसार ग्रामसेवक शेवाळेंनी सोमनाथ पगारे याच्या विरोधात ग्रामपंचायत कार्यालयाचा बनावट लेटरपॅड, बनावट शिक्के तयार करून ग्रामसेवकाची बनावट सही केल्याप्रकरणी फसवणुकीचा गुन्हा दिंडोरी पोलिस ठाण्यात दाखल करण्यात आला आहे. पोलिस निरीक्षक प्रमोद वाघ यांच्या मार्गदर्शनाखाली पोलिस उपनिरीक्षक अजय कौटे व दिंडोरी पोलिस तपास करीत आहे.