नाशिक / सिडको : गेल्या वर्षी वीज विभागाच्या भोंगळ कारभारामुळे सिडकोतील शिवपुरी चौकात राहणाऱ्या केदार कुटुंबातील आजी, आई व मुलीचा करुण अंत झाला होता. आता महापालिकेच्या नगररचना विभागाने केदार कुटुंबीयांना घराचे बांधकाम अनधिकृत असल्याची नोटीस पाठविल्याने नागरिकांमध्ये प्रचंड संताप व्यक्त होत आहे. आता दाद कुणाकडे मागायची, अशी अवस्था केदार कुटुंबीयांची झाली आहे. 

केदार कुटुंबीयांसमोर "दुष्काळात तेरावा महिना'
विधानसभा निवडणुकीच्या आचारसंहितेदरम्यान सिडकोतील शिवपुरी चौकात राहणाऱ्या केदार कुटुंबीयांवर संकट कोसळले होते. घराजवळील अत्युच्च दाबाच्या वीजवाहिनीला स्पर्श झाल्याने आई, आजी व मुलीचा करुण अंत झाला होता, तर मुलगा सुदैवाने बचावला परंतु; त्याला कायमस्वरूपी अपंगत्व आले. यादरम्यान आचारसंहिता असल्याने राजकीय पुढाऱ्यांनी तेवढ्यापुरते आंदोलन करून राजकीय पोळी भाजण्याचा प्रयत्नही केला होता. आता महापालिकेच्या नगररचना विभागाकडून संबंधितांना अतिक्रमण पाडण्याची नोटीस आल्याने केदार कुटुंबीयांसमोर "दुष्काळात तेरावा महिना' असा प्रसंग आला आहे. सिडकोत अनेकांनी अतिक्रमण केले असून, केदार कुटुंबीयांना आर्थिक मदत करायची सोडून अतिक्रमण काढण्याची नोटीस बजावल्यामुळे नागरिकांनी नाराजी व्यक्त केली आहे. 

प्रशासनाच्या भूमिकेवर नागरिकांची नाराजी 
वीजतारा भूमिगत झाल्या असता तर माझ्या आजी, आई व बहिणीचा मृत्यू झाला नसता. मलाही अपंगत्व आले नसते. वीज विभाग व महापालिकेकडून आर्थिक मदत होण्यापेक्षा आता त्यांच्याकडून घराच्या अतिक्रमणासंदर्भात नोटीस आल्याने खूप वाईट वाटले. -शुभम केदार, अपंगत्व आलेला युवक 

अतिक्रमणाबाबतची नोटीस महापालिकेच्या नगररचना विभागाकडून काढण्यात येते. या नोटिशीसंदर्भात सिडको विभागीय कार्यालयाला कुठल्याही प्रकारची कल्पना नाही. अधिक माहिती घेऊन कळवितो. -सोमनाथ वाडेकर, विभागीय अधिकारी, सिडको 

क्लिक करा > VIDEO :...अन् जवानाचे पॅराशूट अडकले बाभळीच्या झाडावर...मग...

हेही वाचा > लग्न जमण्याच्या आधीच 'दोघांना' भेटणं पडलं चांगलच महागात...!